नागपूर : उद्योगातील पॉवर फॅक्टरमुळे उद्योगाच्या बिलात २० ते ३० टक्के वाढ होत असते. त्यामुळे उद्योगात नेमकी कशामुळे ही समस्या निर्माण होत आहे ते शोधून त्यात सुधारणा करण्याचे काम 'इलेक्ट्रिकल एनर्जी मॅनेजमेंट' च्या माध्यमातून करता येणे शक्य होणार आहे. शहरातील अभियांत्रिकी महाविद्यालयाच्या चार विद्यार्थ्यांनी हे सॉफ्टवेअर तयार केले असून त्याद्वारे उद्योगातील विजेचे बिल कमी होण्यास मदत होणार आहे.

उद्योगांमध्ये उत्पादन आणि फायदा या दोन गोष्टींकडे प्रामुख्याने पाहिले जाते. त्यामुळे उद्योगात जितक्या कमी समस्या तितका जास्त फायदा होत असतो. मात्र, उद्योगामध्ये दररोज नव्या समस्या येत असतात. या समस्यांमुळे उत्पादन कमी होण्याची भीती असते. यातील प्रमुख समस्या ही इलेक्ट्रिक हानीची आहे. पॉवर फॅक्टरमुळे उद्योगांना २० ते ३० टक्के अधिकचे बिल भरावे लागते. यामुळे उद्योगांना मोठा फटका बसतो. त्यामुळे ही समस्या सोडविण्यासाठी अभिजित भोयर, संदेश वाघमारे, हर्षद वैद्य आणि मयूर डफरे या चार विद्यार्थ्यांनी एक सॉफ्टवेअर विकसित केले. या सॉफ्टवेअरच्या माध्यमातून उद्योगातील समस्यांचे सोल्यूशन देण्याचे काम केले आहे. केवळ सॉफ्टवेअर नव्हे तर त्यासंबंधीचे हार्डवेअर देण्याचेही काम ते करतात. यासाठी त्यांनी 'सेन्सलिव्ह' नावाची कंपनी स्थापन करीत बऱ्याच उद्योगांमधील समस्या सोडविण्याचे काम केले आहे.

अशी सोडवितात समस्या -

उद्योगातील प्रत्येक मशिनवर सेंसर डिव्हाईस लावून त्यामध्ये विजेचा वापर किती होत आहे याचा डेटा मिळविला जातो. हा डेटा सॉफ्टवेअरमध्ये एकत्र करून नेमका कुठे लॉस होतो आहे याची माहिती उद्योजकांना देण्यात येते. त्यानंतर ते लॉस दूर करण्यासाठी सोल्यूशन दिले जाते. यासाठी प्रत्येक युनिटमागे १० हजार रुपयांचा खर्च येतो.