नागपूर : पारडी परिसरातील आरामशीनच्या गोदामातून सागवानच्या साहित्याची चोरी करणाऱ्या दोघांना पोलिसांनी अटक केली. सूरज राजेश वर्मा (वय २६, रा. पुनापूर, स्मशानभूमीजवळ), रवींद्र दिलीप शर्मा (वय २०, रा. भोलेश्वर सोसायटी, पुनापुर रोड) अशी अटक केलेल्या आरोपींची नावे आहेत.

मनिलाल भाऊजी पटेल (वय ६४, रा. महादेव नगर, भरतवाडा, कळमना) यांची मुरलीधर मंदिराजवळ आरामशीन कंपनी आहे. गेल्या काही दिवसांपासून त्यांच्या आरामशीनमधून सागवानाचे साहित्य आणि लाकूड चोरीला जात असल्याची माहिती समोर आली. दरम्यान १५ नोव्हेंबरला दुपारी तीन वाजताच्या सुमारास दोघांनीही त्यांच्या गोदामातून सागवान लाकडाचे साहित्य चोरून नेले.

याबाबत तक्रार केल्यावर पोलिसांनी सीसीटीव्ही फुटेजच्या आधारे त्यांना ताब्यात घेतले. यावेळी त्यांनी गोदामातून मोटारसायकलवर सागवानी लाकडाच्या २५ फेम, १५ नग सागवानी लाकूड असा एकूण १ लाख ६० हजाराचा मुद्देमाल मोटारसायकलवर चोरून नेल्याची कबुली दिली. पोलिस उपनिरीक्षक इंगळे यांनी आरोपीविरुद्ध गुन्हा नोंदवून अटक केली.