नागपूर : एका वाहतूक पोलिस शिपायाने शंभर रुपयाची लाच घेतल्याचा व्हिडिओ समाजमाध्यमावर व्हायरल होताच याची गंभीर दखल घेऊन वरिष्ठ अधिकाऱ्यांनी त्याला तातडीने निलंबित केले आहे. किशोर दोरखंडे असे निलंबित शिपायाचे नाव आहे.

प्राप्त माहितीनुसार, अजनी वाहतूक शाखेचा कर्मचारी किशोर दोरखंडे हा मंगळवारी सकाळीच तुकडोजी चौकात कर्तव्यावर होता. दरम्यान मेडिकल रुग्णालयातील दोन परिचारिकांना किशोर यांनी पकडले. हेल्मेट नसल्याचे सांगून ५०० रुपये दंडाची पावती तयार करण्याची धमकी दिली. त्यांनी शासकीय रुग्णालयातील कर्मचारी असल्याचे सांगून सोडण्याची विनंती केली.

मात्र, त्याने दंडाची पावती तयार करण्याऐवजी दोनशे रुपयांची लाच मागितली. परिचारिकेने २०० रुपये नसल्याचे सांगताच त्याने १०० रुपये देण्यास सांगितले. एका परिचारिकेने किशोर यांना १०० रुपये दिले आणि सुटका करवून घेतली.

मात्र, हा सर्व प्रकार तुकडोजी चौकातील एका युवकाने मोबाईलमध्ये कैद केला. ती चित्रफीत लगेच समाजमाध्यमांवर व्हायरल केली. ही चित्रफीत पोलिस उपायुक्त चेतना तिडके यांच्यापर्यंत पोहचली. त्यांनी शहानिशा करून वाहतूक कर्मचारी किशोर दोरखंडे याला निलंबित केले. वाहतूक पोलिस दलात लाचखोरी वाढली असून अनेक पोलिस कर्मचारी वाहतूक नियंत्रित करण्याऐवजी घोळका करून वाहनचालकांकडून वसुली करीत असल्याने वाहन चालकांमध्येही मोठी नाराजी आहे.