नागपूर - पेट्रोल, सिलिंडरपाठोपाठ आता तूर डाळीचे भाव गगनाला भिडणार आहेत. त्यामुळे साधा वरणभात करतानाही गृहिणींना विचार करावा लागणार आहे.

कृषी उत्पन्न बाजार समितीमध्ये घाऊक बाजारात तूरडाळ थेट ११५ ते १२२ रुपये किलो झाली आहे. तर किरकोळ बाजारात आता एक किलो तुरीसाठी १२५ ते १३५ रुपये मोजावे लागत आहे.

सर्वसामान्यांच्या ताटातील पौष्टिक खाद्य पदार्थ म्हणून डाळीकडे पाहिले जाते. आता ही महाग झाल्याने घरात खावे तरी काय असा प्रश्न पडू लागला आहे. येत्या काही दिवसात तूर डाळीच्या दरात वाढ होऊन १५० रुपये प्रतिकिलो होण्याची शक्यता व्यक्त होत आहे.

गेल्या पंधरा दिवसापासून तूर व हरभरा डाळीच्या किमतीत दररोज वाढ होत आहे. आवक कमी झाल्याने तूर डाळींचे दर प्रतिकिलो सहा रुपयांनी वाढले आहे. आवक कमी असल्याने साठेबाजांनी तुरीची साठवण केलेली आहे.

त्यामुळेच कृत्रिमरित्या ही भाववाढ केल्याची चर्चा बाजारात नव्याने होत आहे. बाजारात तुरीची आवक कमी झालेली असल्याने भाव वाढ सुरू झाल्याचे बोलले जात आहे.

गेल्या पंधरा दिवसापूर्वी तूर डाळीचे भाव प्रतिक्विंटल १०५ ते ११० रुपये होते. ते ११५ ते १२२ रुपयांवर पोहोचले आहेत. तूर डाळीचे उत्पादन घटल्याने ही भाववाढ सुरु आहे.

यंदा तुरीच्या उत्पादनात २५ टक्के घट झाल्याची माहिती पुढे आली आहे. होळीच्या तोंडावर हरभरा डाळीचे भावही प्रतिक्विंटल ६२०० ते ६४०० रुपयांवरून ६६००- ६८०० रुपयांवर गेले आहेत.

कृत्रिम टंचाईचा गंध

तूर डाळींच्या दरात १५ टक्क्यांपेक्षा अधिक भाववाढ झालेली आहे. याला कृत्रिम टंचाईचा गंध आहे. सरकारने वेळीच हस्तक्षेप केला नाही, तर तूर डाळीचे भाव पुन्हा एकदा वाढण्याची शक्यता व्यापाऱ्यांकडून व्यक्त केली जात आहे.

केंद्र सरकारने हस्तक्षेप केल्याने गव्हाच्या दरात घसरण झालेली आहे. गेल्या पंधरा दिवसात गव्हाचे दर ५ ते ६ रुपये प्रतिकिलो कमी झालेले आहेत. ३५ रुपये किलो असलेले गव्हाचे दर ३० रुपयांवर आले आहे. गव्हासोबतच पीठ, रवा आणि मैद्याचे दरही कमी झालेले आहेत.