नागपूर : जनता चौकाजवळील हॉटेल सेंटर पॉईंट येथे आयोजित वाढदिवसाच्या पार्टीत दोन गटात राडा होऊन एका तरुणीचा विनयभंग करण्यात आला. त्यानंतर दुसऱ्या गटातील युवकांनी एकाला काचेच्या बाटलीने मारहाण करून त्याला गंभीर जखमी केले. या प्रकरणी सीताबर्डी पोलिसांनी गुन्हा दाखल केला.

पोलिसांनी दिलेल्या माहितीनुसार, सोमवारी सौरभ घोडे नावाच्या युवकाचा वाढदिवस होता. त्यामुळे त्याने हॉटेल सेंटर पाँईट येथे पार्टीचे आयोजन करून मित्र आणि मैत्रिणींना आमंत्रित केले होते. याच हॉटेलमध्ये सौरभ सुहास कुळकर्णी (३२) सद्भवनानगर, राहुल निखाडे (जटपुरा, चंद्रपूर) आणि यश राजकुमार शर्मा (२५) मनिषनगर हे जेवण करण्यासाठी आले होते. रात्र झाल्याने तिघांनीही हॉटेलमध्येच खोली बूक करून ते तेथे झोपी गेले.

सकाळी ४.३० वाजेपर्यंत पार्टी सुरू होती. पार्टी रंगात आली असताना यश शर्मा आपल्या साथीदारांसह हॉलमध्ये सुरू असलेल्या पार्टीत गेला. सोफ्यावर पाय ठेवून यश बसला. पीडित २२ वर्षीय तरुणीचा मित्र साहील याने यशला सोफ्यावरून पाय काढण्यास सांगितले. त्यावरून त्यांच्यात वाद झाला. या वादावादीनंतर यश व त्याचे मित्र हॉलमधून बाहेर निघाले. त्यांच्या मागोमाग साहील देखील आला असता यशने साहीलला शिवीगाळ करीत मारहाण केली. तरुणीने मध्यस्थी करण्याचा प्रयत्न केला असता तिच्या अंगाला हात लावून तिला ढकलून दिले. याप्रकरणी तरुणीच्या तक्रारीवरून पोलिसांनी यश शर्मा याच्यावर विनयभंगाचा गुन्हा दाखल केला.

खोलीत घुसून मारहाण

या घटनेनंतर सकाळी ५.३० च्या सुमारास यश हा त्याच्या साथीदारांसह पाचव्या मजल्यावरील ५५०८ क्रमांकाच्या खोलीत आला. त्यावेळी राजा रंगूनवाला, सोहेल रंगूनवाला, झेन, राजा शरीफ, साहील, तौसिफ, फैजल, सैफ रंगुनवाला, यश गावंडे, विनय भांगे व इतर हे यशच्या खोलीत आले. काचेच्या बाटलीने यशच्या डोक्यावर, हातावर वार करून त्याला ठार मारण्याचा प्रयत्न केला. याप्रकरणी सीताबर्डी पोलिसांनी गुन्हा दाखल केला आहे.