नागपूर : काँग्रेसच्या प्रदेशाध्यक्षांचा उमेदवार जिल्ह्यातील दोन मंत्र्यांनी बदलावला. त्यांचे मंत्रीसुद्धा ऐकत नाही हे यावरून स्पष्ट झाले आहे. त्यामुळे नाना पटोले (Nana Patole) यांनी प्रदेशाध्यक्षपदाचा राजीनामा द्यावा, अशी मागणी माजी ऊर्जामंत्री तसेच विधान परिषदेचे भाजपचे उमेदवार चंद्रशेखर बावनकुळे (Chandrashekhar Bawankule) यांनी केली.

नाना पटोले यांनी रवींद्र भोयर यांना उमेदवारी दिली होती. त्यांची हमीसुद्धा घेतली होती. मात्र, त्यांना काँग्रेसच्या नेत्यांनी असमर्थ ठरविले. मतदानाच्या आदल्या दिवशी अपक्ष उमेदवार मंगेश देशमुख यांना काँग्रेसने पाठिंबा दिला. त्यामुळे प्रदेशाध्यक्षाची नाचक्की झाली आहे. दोन मंत्र्यांच्या दबावात नागपूर विधान परिषदेचा उमेदवार काँग्रेसने (Congress) बदलला. एवढे हतबल प्रदेशाध्यक्ष काँग्रेसने प्रथमच बघितले असेल असेही बावनकुळे म्हणाले.

ओबीसींचा इम्पिरिकल डाटा गोळा करण्यासाठी मागासवर्ग आयोगाला दिलेले पाच कोटी रुपये तुटपुंजे आहे. ४०५ कोटींचा प्रस्ताव असताना ५ कोटी रुपये देने ही शरमेची बाब आहे. मंत्रिमंडळात अनेक ओबीसी मंत्री आहेत. पाच कोटीत काहीही होणार नाही. यावरून महाविकास आघाडीला ओबीसी समाजाला आरक्षण मिळू द्यायचे नाही हे दिसून येते. ओबीसी आरक्षणाचा निर्णय होत नाही तोवर राज्यात कुठल्याही स्थानिक स्वराज्य संस्थांमध्ये निवडणूक घेण्यात येऊ नये अशी मागणीही बावनकुळे यांनी केली.

भाजपला ३१८ पेक्षा जास्त मत मिळेल

विधान परिषदेच्या निवडणुकीत घडलेल्या नाट्यमय घडामोडींमुळे जिल्ह्यातील कार्यकर्त्यांचे मनोबल खचले आहे. सर्वच मतदान संभ्रमात होते. १४ तारखेला होणाऱ्या मतमोजणीत हे दिसणारच आहे. भाजपला (BJP) ३१८ पेक्षा जास्त मत मिळेल, असाही दावा बावनकुळे यांनी केला.