नागपूर - ‘प्रेम से बोलो, जय माता दी’, ‘जयकारा शेरावाली मा का, बोलो साचे दरबार की जय...’ असा गजर करीत मूर्तीकारांकडे चाललेले तरुण, घटस्थापनेसाठी आवश्यक असणारे साहित्य खरेदी करण्याची सुरू असलेली लगबग, सार्वजनिक नवरात्र उत्सव साजरा करणाऱ्या मंडळांचे मंडप उभारणीचे अंतिम टप्प्यात आलेले काम... असे वातावरण शनिवारी उपराजधानीत नवरात्र उत्सवाच्या पार्श्वभूमीला दिसून आले.

शहरामध्ये रविवारी (ता. १५) ठिकठिकाणी घटस्थापना होणार असून आदिशक्तीच्या जागराला सुरुवात होणार आहे. काही सार्वजनिक नवरात्रोत्सव मंडळांमध्येही घट बसवतात तर काही ठिकाणी देवीची सुंदर मूर्तीची प्रतिष्ठापना केली जाते. मागील २ वर्षांपासून कोरोनामुळे साध्या पद्धतीने उत्सव साजरे केले जात होते. गेल्या वर्षीपासून गणेशोत्सवाचा सणही थाटात साजरा करण्यात आला आहे.

नवरात्रीची, घरातील घटस्थापना असो किंवा दांडिया, तरुणाई सज्ज झाल्याचे दिसत आहे. अनेकांच्या घरी घट बसवले जातील. याशिवाय शहरातील पारडी येथील भवानी माता मंदिर, गणेशपेठ येथील आग्याराम देवी मंदिर, छावनी येथील देवीचे मंदिर, मनीषनगरातील देवीच्या मंदिरांवर आकर्षक रोषणाई करण्यात आली असून उत्सवी वातावरण दिसून येत आहे. उद्यापासून दहा दिवस गरबाचीही धूम राहणार असून विविध संस्थांनी आयोजन केले असून तरुणाई नृत्यासाठी नियोजन केल्याचे दिसून येत आहे.