नागपूर : नववर्षाचे स्वागत जल्लोषात करण्यासाठी शहरात एकीकडे ठिकठिकाणी पार्टी आणि कार्यक्रमांचे आयोजन करण्यात येत आहे. तेव्हा दारू पिऊन हुल्लडबाजी करणाऱ्या मद्यपींवर कारवाईसाठी उद्या शनिवारी (ता.३१) सायंकाळपासूनच संपूर्ण शहरात अडीच हजार पोलिसांचा ताफा तैनात करण्यात आले.

यासाठी उपराजधानीतील २५ फिक्स पॉइन्ट निश्चित करण्यात आले असल्याची माहिती पोलिस आयुक्त अमितेश कुमार यांनी दिली. कुटुंबासह जाणाऱ्यांना कोणताही त्रास होणार नाही याची काळजी घेण्याच्या सूचनाही आयुक्तांनी वरिष्ठ पोलिस अधिकाऱ्यांना दिल्या.

फुटाळा, धरमपेठसह तरुणाई जमा होणाऱ्या ठिकाणीही पोलिसांची विशेष गस्त राहील. महिला व मुलींची छेड काढणाऱ्यांना थेट कोठडीत डांबण्याचे आदेश आयुक्तांनी पोलिस निरीक्षकांना दिले आहे.

थर्टी फर्स्टला उड्डाणपुलावरील वाहतूक बंद करण्यात यावी अथवा नाही हे परिस्थितीनुसार ठरविण्याचे अधिकार संबंधित पोलिस उपायुक्तांना देण्यात आले आहेत. रात्री १२ वाजतानंतर ध्वनीक्षेपक वाजविणाऱ्याविरुद्ध कायद्यानुसार गुन्हे दाखल करण्यात येतील,असा इशाराही अमितेशकुमार यांनी दिला.

जामिनावर कारागृहातून बाहेर आलेल्या २५० पेक्षा अधिक गुन्हेगारांवर पोलिसांचा ‘वॉच’ आहे. ड्रंकन ड्राइव्ह कारवाईसाठी ७५ मशिन्स आहेत. नागरिकांनी उत्साहात व शांततेत नववर्षाचे स्वागत करावे,असे आवाहन पोलिस आयुक्त अमितेशकुमार यांनी केले.

४० जणांना परवानगी

नववर्षांच्या स्वागतासाठी आयोजित पार्ट्यांसाठी आतापर्यंत ४० जणांना परवानगी देण्यात आली आहे. समाजमाध्यमांवरून विना परवानगी पार्टीची जाहिरात देणाऱ्या १६ प्रतिष्ठानांना परवानगी घेण्याच्या सूचना देण्यात आल्या आहेत.

पार्टी असलेली ठिकाणे, हॉटेल्स मालकांना महिलांच्या सुरक्षेची काळजी घेण्याचे आदेशही देण्यात आले आहेत. या ठिकाणी सीसीटीव्ही लावण्याचेही त्यांना बजावण्यात आले आहे. पार्टीच्या ठिकाणी साध्या गणवेशात महिला पोलिस तैनात करण्यात येणार आहेत.

स्वत-सह इतरांची काळजी घ्या

नागरिकांनी वाहतूक नियमांचे पालन करावे. नववर्षाच्या स्वागतादरम्यान आपल्यामुळे कुणाचाही जीव धोक्यात येणार नाही याची काळजी वाहन चालविताना घ्यावी, असे आवाहन पोलिस आयुक्तांनी केले आहे.