नागपूर : कोरोनारुग्ण जास्त असलेल्या भागाला कंटेन्मेंट क्षेत्र घोषित करून टीन टाकण्यात आले. परंतु, येथे सुरक्षा रक्षक नसल्याने नागरिक बिनधास्त फिरताना दिसत आहेत. शिवाय कोरोनारुग्ण असल्याबाबतचे बऱ्याच ठिकाणी फलकही लावण्यात आलेले नाही. त्यामुळे कोरोनाला आळा बसणार कसा, असाच प्रश्न निर्माण होत आहे.

राज्य सरकारने कोरोनाची चेन तोडण्यासाठी निर्बंध अधिक कडक केलेत. त्यासाठी कंटोन्मेंट झोन तयार करण्याच्या सूचना दिल्या. महानगरपालिकेकडून जास्त रुग्णसंख्या असलेल्या भागात कंटोन्मेंट झोन तयार करण्यात येत आहे. दोन्ही बाजूला टिन टाकून रस्ता बंद करण्यात येत असून काही भाग खुला ठेवण्यात येते. परंतु येथे सुरक्षा रक्षकाची नियुक्तीच केलेली नाही. परिणामी कंटोन्मेंट भागातील नागरिक बिनधास्त फिरत आहे. घरीच विलगीकरणात असलेल्यांच्या घराबाहेर कोरोनारुग्णाबाबतचे पोस्टरही लावण्यात येत नाही. त्यामुळे त्यांच्याकडेही अनेक जण ये-जा करीत असल्याचे सांगण्यात येते. शहरातील अनेक भागात रुग्ण असल्याने तेथे कंटोन्मेट झोन तयार करण्यात आले. परंतु सुरक्षा रक्षकाची नियुक्ती करण्यात आली नसल्याचे सांगण्यात येते.