नागपूर : दरवर्षी उन्हाळ्यात कोर्टाला सुट्या असतात. यंदा मात्र लाँकडाऊनमुळे कोर्टाचे कामकाज मार्चमध्येच बंद करावे लागले. ते कामकाज भरून काढण्यासाठी यंदा उन्हाळी सुट्या रद्द करण्यात येणार अाहेत.
 कोरोनाचा वाढता प्रादुर्भाव लक्षात घेता मुंबई उच्च न्यायालयाच्या मुख्य न्यायमूर्तींनी न्यायालयीन कामकाजावर निर्बंध आणले. या संकटकाळी न्यायालयाचे कामकाज कमी झाले आहे. त्यामुळे, न्यायालयांची उन्हाळी सुटी रद्द करण्याचा निर्णय मुंबई उच्च न्यायालय प्रशासनाने घेतला.

पूर्वीच्या नियोजनानुसार न्यायालयाला ७ मे ते ७ जूनपर्यंत सुट्या जाहीर करण्यात आल्या होत्या. मात्र, ३ मे नंतर लॉकडाउन मागे घेण्यात आला; तर, मुंबई उच्च न्यायालयासह नागपूर व औरंगाबाद खंडपीठांमध्ये आणि राज्यभरातील सर्व न्यायालयांत नियमित कामकाज होईल, असे प्रशासनाने स्पष्ट केले. याशिवाय, उच्च न्यायालयाच्या कामकाजात अर्ध्या तासाने वाढ करण्यात येईल. त्यानुसार, दररोज सकाळी ११ ऐवजी १०.३० वाजता न्यायालयीन कामकाज सुरू होईल, असे उच्च न्यायालयाचे रजिस्ट्रार जनरल एस. बी. अग्रवाल यांनी स्पष्ट केले.  त्यानुसार, लॉकडाउन मागे घेण्यात आले तर दररोज सकाळी १०.३० पासून उच्च न्यायालयांचे न्यायालयीन कामकाज होईल.

सविस्तर वाचा - अशी वेळ कोणावरही येऊ नये...कोरोनाबाधितावर अंत्यसंस्कार करणा-या कर्मचा-याच्या भावना

लॉकडाउन कायम राहिल्यास सध्याच्या व्यवस्थेप्रमाणे उच्च न्यायालयांचे कामकाज चालेल’, असे अग्रवाल यांनी स्पष्ट केले. सध्याच्या लॉकडाउनच्या काळात आठवड्यातून दोन दिवस केवळ दोन तासांसाठी  तातडीच्या व अत्यंत महत्त्वाच्या प्रकरणांवर सुनावणी घेण्यात येत आहे. उच्च न्यायालयाप्रमाणेच राज्यभरातील कनिष्ठ न्यायालयांमध्ये पुढील महिन्यात ज्या कालावधीत उन्हाळी सुटी असते ती यंदा नसेल आणि लॉकडाउन मागे घेण्यात आल्यानंतर त्या कालावधीत न्यायालयांचे नियमित कामकाज होईल, असेही उच्च न्यायालय प्रशासनाने स्पष्ट केले आहे.