नागपूर : कोरोना काळातील वीज बिल माफ करावे यासाठी विदर्भ राज्य आंदोलन समितीच्या वतीने सोमवारी व्हेरायटी चौकातील गांधीपुतळ्यावर ठिय्या आंदोलन करण्यात आले. पुढच्या टप्प्यात चार जानेवारीला ऊर्जामंत्री नितीन राऊत यांच्या घराला घेराव घालण्यात येणार आहे.

कोरोना काळातील वीज बिल सरकारने भरावे, दोनशे युनिटपर्यंत वीज मोफत द्यावे आदी घोषणा आंदोलनदरम्यान देण्यात आल्या. तसेच वेगळ्या विदर्भासाठी नारे लावण्यात आले. राम नेवले यांच्या नेतृत्वात आंदोलकांनी दुपारी बारा ते चार वाजेपर्यंत ठिय्या आंदोलन केले.

हेही वाचा - डोळ्यांना कमी दिसत असल्याने सासऱ्याने रक्कम दिली जावयाकडे; मात्र, केला विश्‍वासघात

रोजगार व उद्योग धंदे बंद असतानाही वीज बिलाची आकारणी करून सरकार जनतेवर अन्याय करीत आहे, बिलामध्ये २१ टक्के वाढ करून ते तीन महिन्यांचे एकत्रित बिल घेऊन सरकारने लूटमार केली असा आरोप यावेळी नेवले यांनी केला.

वीज तोडली तर विदर्भ राज्य आंदोलन समिती तोडलेले कनेक्शन जोडून देण्याचे आंदोलन करणार आहे. आता विजेच्या व विदर्भाच्या प्रश्‍नावर महाराष्ट्र सरकार व केंद्र सरकारशी मोठा संघर्ष होणार आहे. चार जानेवारीला ऊर्जामंत्री नितीन राऊत यांच्या घराला घेराव घालून त्यांच्या घरावर विदर्भातील जनता डेरा टाकणार असल्याचे नेवले यांनी जाहीर केले.

अधिक माहितीसाठी - तुझ्याशी लग्न करायचे आहे, असे बोलून अधिकारी युवतीचा त्याने केला पाठलाग, युवकाविरुद्ध गुन्हा दाखल

आंदोलनात युवा आघाडी नागपूर विभाग अध्यक्ष मुकेश मासुरकर, महिला आघाडी अध्यक्षा नागपूर शहर रेखा निमजे, विष्णू आष्टीकर, सुयोग निलदावार, ज्योती खांडेकर, सुनिता येरणे, गुलाबराव धांडे, नरेश निमजे, नितीन अवस्थी, राजेंद्र सतई, तुषार ब्राम्हणकर, रवींद्र भामोडे, विना भोयर, प्रशांत जयकुमार, अनंतराव भुरे, प्यारूभाई, प्रफुल बोबडे, आदी प्रामुख्याने सहभागी झाले होते.

संपादन - नीलेश डाखोरे