नागपूर : लॉकडाउनला नागपूरकरांनी गांभीर्याने न घेतल्यामुळे पोलिसांनाच आता आक्रमक भूमिका घ्यावी लागत आहे. रस्त्यावर विनाकारण फिरणाऱ्यांची कोरोना ॲंटीजेन टेस्ट करण्याचा निर्णय पोलिस आयुक्त अमितेश कुमार यांनी घेतला. आज शनिवारी पहिल्याच दिवशी २५५ जणांची टेस्ट केली असता त्यात तब्बल १८ जण करोनाबाधित निघाले. त्यांना ताबडतोब पोलिसांनी व्यवस्था केलेल्या विलगीकरणात रवाना केले आहे.

कोरोनाची परिस्थिती हाताळताना शहरातील आरोग्य व्यवस्था पूर्णपणे कोलमडली असून प्रशासनही हतबल झाले आहे. उपचार,ऑक्सिजन व औषधांच्या अभावानेच लोकांचा मृत्यू होत आहे. या साथीवर नियंत्रण मिळवण्यासाठी राज्यात संचारबंदी जाहीर करण्यात आली. त्यानंतरही लोकांकडून नियमांचे पालन करण्यात येत नसल्याने पोलिसांनी आता कठोर पावले उचलली आहेत.

ठिकठिकाणी नाकाबंदी लावली असून विनाकारण फिरणाऱ्यांविरुद्ध कारवाई करण्यात येत आहे. या प्रयत्नानंतरही रस्त्यावरील गर्दी कमी होताना दिसत नसल्याने पोलिसांनी आता नाकाबंदीच्या ठिकाणीच विनाकारण फिरणाऱ्यांची कोरोना टेस्ट करण्याचा निर्णय घेतला. जुना काटोल नाका, ऑटोमोटीव्ह चौक, मेयो चौक, मानेवाडा चौक आणि प्रतापनगर चौकात महापालिकेच्या मदतीने अँटीजेन कोरोना चाचणी करण्यात आली.

या ठिकाणी अनुक्रमे शहरातील पोलिस उपायुक्त विनिता शाहु, नीलोत्पल, लोहित मतानी, विवेक मासळ आणि नुरुल हसन यांनी नेतृत्व केले. स्वतः डीसीपींनी पोलिसांनी रस्त्याने ये जा करणाऱ्यांची चौकशी केली असता कुणी किराणा घ्यायला, कुणी औषधासाठी जाताना दिसले. बऱ्याच प्रमाणात लोक कामावर जाण्यासाठी निघाले होते. विनाकारण फिरणाऱ्या २५५ जणांची टेस्ट करण्यात आली असून त्यापैकी १८ जणांचा अहवाल पॉझिटिव्ह आला. त्यांना ताबडतोब १४ दिवसांकरिता विलगीकरणात पाठवण्यात आले आहे.

५०० वाहने जप्त

पोलिसांनी विनाकारण फिरणाऱ्यांची कोरोना चाचणी करण्याशिवाय इतर नियमांचे उल्लंघन करणाऱ्यांवरही कारवाई केली. मास्क न घालणाऱ्या ३४७, सुरक्षित अंतर नियम न पाळणारे ७८० जणांविरुद्ध कारवाई करण्यात आली. तर ५०० वाहने जप्त करण्यात आली. उद्यापासून आणखी कडक कारवाई होणार आहे.

संपादन - अथर्व महांकाळ