नागपूर : पेंच व्याघ्र प्रकल्पालगतच्या गावातील आदिवासी संस्कृतीची ओळख व्हावी, स्थानिक कलाकारांना प्रोत्साहन मिळावे या उद्देशाने कोलितमारा येथे कृषी- वन पर्यटन सुरू करण्यात येत आहे. यामध्ये बैलगाडी चालवणे, म्हशीची सवारी आणि शेतीच्या कामात सहभागी होता येणार आहे. याशिवाय पर्यटकांना समृद्ध आदिवासींचे दैनंदिन जीवन, सण-उत्सव इत्यादींची ओळख करून दिली जाणार आहे. गावात पिकवल्या जाणाऱ्या विविध प्रकारच्या पिकांच्या शेतीचे तंत्रही जाणून घेण्याची संधी पर्यटकांना मिळणार आहे.

पेंच नदीच्या पश्चिमेकडील नागलवाडी बफर क्षेत्रातंर्गत कोलितमारा गाव आहे. हे पेंच व्याघ्र प्रकल्पातील सात सफारी पर्यटक प्रवेशद्वारापैकी एक आहे. येथेच सर्वात जुन्या वन विश्रामगृहही आहे. हा परिसर निसर्गप्रेमी आणि पक्षी निरीक्षकांसाठी नंदनवन आहे. आदिवासीबहुल असल्याने आदिवासींच्या जीवनाचे अनोखे दर्शन या गावात घडते.

पर्यटकांना यासाठी स्थानिक गाईड घ्यावा लागणार आहे. कोलितमारा ग्रामविकास समिती आणि आनंदीबाई बचतगट यांच्यामार्फत पेंच व्याघ्र प्रकल्पाचा हा संयुक्त प्रकल्प आहे. कोलितमाराच्या पर्यटन संकुलातही राहण्याची सोय आहे. पर्यटक सफारीही बुक करू शकतात. मोठ्या गटांना कॅंटर उपलब्ध करून दिला जाणार आहे. सुविधेसाठी फक्त mahaecotourism.gov.in द्वारे ऑनलाइन बुकिंग करता येणार आहे.

यात सुमारे ५० लोकांना थेट रोजगार देण्याची योजना आहे, असे प्रकल्पाचे उपसंचालक डॉ. प्रभुनाथ शुक्ल यांनी कळविले आहे.

रात्रीच्या मुक्कामाची सोय उपलब्ध

निसर्गरम्य जंगलाच्या पार्श्वभूमीवर पेंच नदीत बोटिंगचा आनंद घेऊ शकणार आहे. समृद्ध पक्षी विविधतेमुळे, पर्यटकांना या भागातील समृद्ध जैवविविधतेचा वारसा न्याहाळता येणार आहे. गावातील शेतात उभारलेल्या मचानांवरुन तारे पाहणे आणि रात्रीचा मुक्कामही करता येणार आहे. दरम्यान, आदिवासी समुदायाशी संवाद, ग्रामीण खेळ, सूर्यास्त आणि सूर्योदयाचे दृश्यही पाहता येणार आहे. स्थानिक खाद्यपदार्थांसाठी शेतात लावलेल्या भाज्यांचा आस्वादही घेता येणार आहे.