नागपूर : नागपूरच्या डॉ. बाबासाहेब आंबेडकर आंतरराष्ट्रीय विमानतळावर इंडिगो एअरलाइन्सच्या वैमानिकाला आज हृदयविकाराचा धक्का आला. विमान टेकऑफ करण्यापूर्वी ही बाब घडल्याने परिसरात एकच खळबळ उडाली. दुर्दैवाने, वैमानिकाचा मृत्यू झाला.

कॅप्टन मनोज सुब्रह्मण्यम (वय ४०) असे या वैमानिकाचे नाव आहे. इंडिगो एअरलाइन्सचे नागपूर-पुणे विमान दुपारी एक वाजता उड्डाण घेणार होते. त्यासाठी कॅप्टन मनोज सुब्रह्मण्यम हे निघाले असताना बोर्डिंग गेटजवळ अचानक कोसळले.

विमानतळावरील कर्मचाऱ्याच्या मदतीने त्यांना उचलण्यात आले. विमानतळावरील वैद्यकीय चमूने प्राथमिक तपासणी केली. त्यानंतर, त्यांना रुग्णालयात हलविण्यात आले. मात्र, त्यांचा मृत्यू झाला. मनोज हे ‘ब्रॉट डेड’ असल्याचे कळताच त्यांना शासकीय वैद्यकीय महाविद्यालय व रुग्णालय (मेडिकल) येथे हलविण्यात आले, अशी माहिती किम्स-किंग्ज्वे रुग्णालयाचे उपमहाव्यवस्थापक (ब्रॅँडिंग अॅण्ड कम्युनिकेशन्स) एजाज शमी यांनी दिली.

कॅप्टन मनोज सुब्रह्मण्यम हे २७ तासांच्या विश्रांतीनंतर पुन्हा कामावर रुजू झाले होते. विश्रांतीपूर्वी, त्यांनी तिरुअनंतपुरम-पुणे-नागपूर या मार्गावर विमान चालविले होते. मनोज यांच्या मृत्यूचे प्राथमिक कारण हृदयविकाराचा धक्का असल्याचे सांगण्यात येत असले तरी शवविच्छेदनानंतर नेमके कारण स्पष्ट होण्याची अपेक्षा आहे.

इंडिगोकडून शोकसंवेदना

वैमानिक मनोज सुब्रह्मण्यम यांच्या मृत्यूनंतर इंडिगो एअरलाइन्सने निवेदन जाहीर करत शोकसंवेदना व्यक्त केली. ‘आज नागपूरमध्ये आमच्या एका वैमानिकाचे निधन झाल्याचे दुःख आहे. नागपूर विमानतळावर त्यांची तब्येत अचानक बिघडली. उपचारासाठी त्यांना तातडीने रुग्णालयात नेण्यात आले. मात्र, तेथे त्यांचे दुर्दैवी निधन झाले,’ असे म्हणत कंपनीने त्यांचे कुटुंबीय आणि आप्तस्वकीयांना हा धक्का सहन करण्याचे बळ मिळो, अशी प्रार्थना केली आहे.