नागपूर : मेडिकलशी संलग्न सुपर स्पेशालिटी हॉस्पिटलमध्ये बाह्यरुग्ण विभागात दर दिवसाला रुग्णांची प्रचंड गर्दी वाढत आहे. मात्र, यावर उपाययोजना होत नसल्यामुळे या गर्दीला आवरता येत नाही. विशेष असे की, गर्दीतील रुग्णांनी किती वेळ रांगेत उभे राहायचे, असा सवाल करीत या रांगेत कार्डाची प्रतीक्षा करीत मरायचे का? अशी व्यथा बोलून दाखवली. कार्ड काढण्यासाठी दोन तास उभे राहिल्यानंतर उपचारासाठी किती तास उभे राहायचे, असा सवालही रुग्णांनी केला. सोमवारी दोन रुग्ण भोवळ येऊन पडल्याची चर्चा येथे होती.
सोमवारी (ता. 6) सुपर स्पेशालिटीत हृदयरोग विभागासह मेंदुरोग विभागाच्या बाह्यरुग्ण विभागात रुग्णांची सुमारे पन्नास मीटरपेक्षा जास्त रांग लागली होती. यामुळे येथे हृदयरोग विभागात आलेल्या आणि रांगेत शेवटी असलेल्या रुग्णांचा नंबर तब्बल तीन तासांनंतर लागतो. यामुळे रुग्णांना भोवळ येऊन खाली पडण्यासोबतच इतरही त्रास होत असल्याची व्यथा रुग्णांनी व्यक्त केली.
येथे कार्यरत डॉक्टरांची संख्या कमी आणि रुग्णांची संख्या दिवसेंदिवस वाढत आहे. सुपरची ओपीडी (बाह्यरुग्ण विभाग) "हाउसफुल्ल' असल्यामुळे येथे रुग्णांना प्रतीक्षा करण्यासाठी जागाही उपलब्ध नसते. यामुळे रुग्ण बाहेर उभे असतात. ओपीडीची जागा बदलण्याची खरी गरज आहे. सुपरमधील बाह्यरुग्ण विभागात सोमवारी न्यूरोलॉजी, कार्डिओलॉजी, सीव्हीटीएस, न्यूरो सर्जरी विभागाचा बाह्यरुग्ण विभाग असतो. यामुळे या दिवशी सुपरच्या बाह्यरुग्ण विभागात रुग्णांची तोबा गर्दी उसळते.
सुपरमध्ये एक हजारापेक्षा जास्त रुग्णांची नोंद होते. डॉक्टरांची संख्या कमी असते. यामुळे येथे रुग्ण दिवसभर उपचाराच्या प्रतीक्षेत असतात. जागा नसल्यामुळे कोणी चहाटपरीवर तर कोणी बाहेरच्या पटांगणात आराम फर्मावत असतात. मात्र, बाह्यरुग्ण विभागात कार्ड काढण्यासाठी तब्बल पाचशे रुग्ण प्रतीक्षेत असतात. याकडे प्रशासनाने मात्र डोळेझाक केली आहे.
सोमवारी गर्दी लक्षात घेता रुग्णांना त्वरित कार्ड उपलब्ध व्हावे, या हेतूने अतिरिक्त संगणक लावण्याची सोय करावी. एक खिडकी वाढवण्यात यावी, अशी मागणी सिव्हिल ह्युमन राइट प्रोटेक्शन असोसिएशनतर्फे करण्यात आली आहे.
अवश्य वाचा - वडिलांच्या प्रेमाला मुकल्याने तीने केले असे...
अतिरिक्त खिडकी न उघडल्यास रुग्णांची सुपर स्पेशालिटीत हेळसांड होत असल्याचे कारण पुढे करीत राज्याच्या मानवाधिकार आयोगाकडे असोसिएशनतर्फे तक्रार करण्यात येईल, असे कळविण्यात आले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.