नागपूर - प्रख्यात रणनितीकार प्रशांत किशोर स्वतंत्र विदर्भ राज्याच्या मागणीला बुस्टर डोस देणार असल्याने पुन्हा विदर्भाची चळवळ जोर धरण्याची शक्यता निर्माण झाली आहे. ते २८ सप्टेंबरला नागपूरला येत आहेत.

२०१४ साली मोदींचा विजयात प्रशांत किशोर यांच्या रणनीतीचा मोठा वाटा आहे. त्यानंतर पंजाब, बंगाल, आंध्रप्रदेश, तेलंगणा, दिल्लीच्या निवडणुकांमध्ये त्यांची रणनीती यशस्वी राहिली. आता ते विदर्भाच्या आंदोलनात उडी घेणार आहेत. विदर्भ राज्याचे खंदे समर्थक, माजी आमदार आशिष देशमुख यांनी त्यांना प्रस्ताव दिला होता. तो त्यांनी मान्य केला आहे.

दोन-अडीच महिन्यांपासून विदर्भाच्या ११ जिल्ह्यांमध्ये वेगळ्या विदर्भासाठी काम करणाऱ्या लोकांची एक टिमसुद्धा त्यांना भेटून आली आहे. त्याचा अहवाल प्रशांत किशोर यांना देण्यात आला आहे. गेल्याच आठवड्यात झुम मिटींगच्या माध्यमातून त्यांनी सर्वांना संबोधित केले. २८ सप्टेंबर १९५३ साली झालेला नागपूर करार, संयुक्त महाराष्ट्रात सहभागी झाल्यानंतर झालेली अधोगती, अन्याय, दिलेली व न पाळलेली आश्वासने याची माहिती त्यांना देण्यात आली असल्याचे देशमुख यांनी सांगितले.

ही बाब त्यांच्याही लक्षात आली. त्यामुळे ते रणनीती आखणार आहेत. येत्या २८ सप्टेंबरला नागपुरात त्यांचे मार्गदर्शन आम्हाला मिळणार आहे, असल्याचे देशमुख यांनी सांगितले. केंद्रीयमंत्री नितीन गडकरी, उपमुख्यमंत्री देवेंद्र फडणवीस या भाजप नेत्यांसह काँग्रेसच्याही नेत्यांनी स्वतंत्र विदर्भाची मागणी वेळोवेळी केली आहे. भाजपने केंद्रात आणि राज्यात सत्तेत आल्यानंतर विदर्भ राज्याची निर्मिती केली जाईल असे आश्वासन येथील जनतेला दिले होते याकडेही देशमुख यांनी लक्ष वेधले.