नागपूर : राष्ट्रीय स्वयंसेवक संघाच्या (Rashtriya Swayamsevak Sangh) नागपुरातील (Nagpur) मुख्यालयाला घेराव घालण्याचा प्रयत्न करण्यात आलाय. हा घेराव भारत मुक्ती मोर्चा (Bharat Mukti Morcha) नावाच्या संघटनेनं घातला आहे. या प्रकरणी पोलिसांनी मुख्यालयाबाहेरून 100 जणांना ताब्यात घेतलं आहे.

याशिवाय, आरएसएस कार्यालयाबाहेरही सुरक्षा व्यवस्था वाढवण्यात आलीय. वामन मेश्राम (Waman Meshram) यांच्या नेतृत्वाखालील भारत मुक्ती मोर्चानं आज नागपुरातील राष्ट्रीय स्वयंसेवक संघाच्या मुख्यालयाला घेराव घालण्याचा प्रयत्न केला आणि संघटनेची विचारधारा भारतीय संविधानानुसार नाही, अशी टीका केली. दरम्यान, पोलिसांनी वामन मेश्राम यांना ताब्यात घेतलंय.

या मोर्चात सहभागी होण्यासाठी भारत मुक्ती मोर्चाचे शेकडो कार्यकर्ते नागपुरात पोहोचले होते. मात्र, पोलिसांनी या मोर्चाला परवानगी नाकारली. त्यामुळं पोलिसांनी हा मोर्चा पुढं जाऊ दिला नाही. पोलिसांनी त्यांना रोखल्यानंतर कार्यकर्त्यांनी इंदोरा चौकातच धरणे सुरू केले. यानंतर पोलिसांनी कारवाई करत कार्यकर्त्यांना ताब्यात घेतलं. यावेळी आंदोलकांनी आरएसएसविरोधात घोषणाबाजीही केली. शहरात धम्मचक्र प्रवर्तन दिन व इतर धार्मिक कार्यक्रम आयोजित करण्यात येत असल्यामुळं भारत मुक्ती मोर्चा संघटनेला पोलिसांनी आंदोलन करण्यास परवानगी नाकारली आहे.

यासोबतच मुंबई उच्च न्यायालयानं वामन मेश्राम यांची याचिका फेटाळून लावत पोलिसांकडं अर्ज करून 6 ते 9 ऑक्टोबर दरम्यान कार्यक्रम आयोजित करण्याचे निर्देश दिलेत. न्यायालयाकडून परवानगी न मिळाल्यानंतर कडक पोलीस बंदोबस्त होता. मात्र, वामन मेश्राम आणि त्यांची संघटना आंदोलनाच्या भूमिकेवर ठाम राहिल्याने नागपूर शहर पोलिसांनी सुरक्षेसाठी संपूर्ण इंदोरा परिसरात कलम 144 लागू केले आहे.