नागपूर : रामनवमीच्या निमित्ताने शहरात भव्य शोभायात्रेचे आयोजन करण्यात आले आहे. सोबतच राममंदिरांमध्येही विविध कार्यक्रमांचे नियोजन असल्याने गुरुवारी संपूर्ण शहर राममय होणार आहे.

गेल्या ५७ वर्षांपासून श्री पोद्दारेश्‍वर राममंदिर येथून तर पश्‍चिम नागपूर नागरिक मंडळाकडूनही भव्य शोभायात्रा काढली जात आहे. यावर्षी शोभायात्रेतून कोल्हापूरची महालक्ष्मी, बागेश्वर धाम, आदासा गणपती, कोराडीची जगदंबा, धापेवाड्याचे विठ्ठल मंदिर, शेगावचे गजानन महाराज देवस्थान

अशा एक-दोन नव्हे तर तब्बल शंभरावर चित्ररथांचे दर्शन गुरुवारी नागपूरकरांना होणार आहे. दुसऱ्या शोभायात्रेत ६० च्यावर चित्ररथ राहणार असून आकर्षक विविध लोकनृत्यांचा सहभाग राहणार आहे, अशी माहिती रामजन्मोत्सव शोभायात्रा समितीचे पुनीत पोद्दार यांनी दिली. विविध मार्गावर विविध भागात प्रवेशद्वार, चौकाचौकात विविध आकर्षक पौराणिक दृश्येही साकारण्यात येणार आहे.

विश्वगुरू भारतावर आधारित चित्ररथ वेधणार लक्ष

पश्चिम नागपूर नागरिक संघाच्यावतीने आयोजित शोभायात्रेत रामायणावर आणि विदर्भातील विविध तीर्थस्थळांवर आधारित ३० पेक्षा अधिक चित्ररथांसह लोकनृत्य आणि विश्वगुरू भारतावर आधारित भारतमातेचा चित्ररथ राहील.हा चित्ररथ, प्रभू रामचंद्राने रावणावर विजय प्राप्त केल्यावर पुष्पक विमानातून अयोध्येत आगमनाचा चित्ररथ आकर्षण ठरणार आहे. शिवाय अनेक मंदिरांमध्ये रामनवमीनिमित्त कार्यक्रमाने शहरातील वातावरण भक्तीमय होणार आहे.