नागपूर : आमदार रवी राणा व खासदार नवनीत राणा सतत शिवसेनेविरोधात बोलत असतात. यामुळे आक्रमक झालेल्या शिवसैनिकांनी आमदार रवी राणा यांच्याविरोधात नागपूर विमानतळावर घोषणाबाजी केली. रवी राणा यांच्या विरोधात शिवसेनेचे कार्यकर्ते आक्रमक झाल्याचे पाहायला मिळाले. यामुळे काही काळ तणावाचे वातावरण निर्माण झाले होते.

अमरावती महापालिका आयुक्तावर झालेल्या शाहीफेक प्रकरणानंतर आमदार रवी राणा गायब झाले होते. कारवाईच्या भीतीने पळून गेल्याचा आरोप त्यांच्यावर करण्यात आला होता. तसेच त्यांनी पत्रकार परिषद घेत राज्य सरकाव व मुख्यमंत्री आपल्याला फसवण्याचा मागे लागल्याचे रवी राणा म्हणाले होते.

कोणत्याची प्रकारची चौकशी न करता सरकार आपल्याला फसवण्याच्या मागे लागल्याचे ते म्हणाले होते. यामुळे शिवसैनिक आक्रामक झाल्याचे पाहायला मिळाले. आमदार रवी राणा (Ravi Rana) हे पोलिसांना घाबरून दिल्ली येथे गेल्याची चर्चा निरर्थक आहे. ते मतदारसंघातील कामासाठी दिल्लीला ठाण मांडून आहेत. योग्य वेळ येताच ते हजर होतील, असे नवनीत राणा म्हणाल्या होत्या.

शाहीफेक प्रकरणात मुख्यमंत्री उद्धव ठाकरे यांच्या दबावातच आमदार रवी राणा (Ravi Rana) तसेच कार्यकर्त्यांच्या विरोधात पोलिस प्रशासनाने गुन्हे दाखल केले आहे. मनपा आयुक्तांच्या तक्रारीची कुठलीही शहानिशा न करता पोलिसांनी गंभीर स्वरूपाचे गुन्हे दाखल केले. या प्रकाराची संसदीय समिती, केंद्रीय अनुसूचित जाती आयोग तसेच मागासवर्गीय आयोगाकडे रितसर तक्रार करणार आहे. दोषी अधिकाऱ्यांवर कार्यवाही करण्याची मागणी करणार असल्याचेही नवनीत राणा म्हणाल्या होत्या.