नागपूर : जिल्हा परिषदेची पहिलीच सभा कोरोनावरच्या उपाययोजनांवर सत्ताधारी आणि विरोधकांनी एकमेकांवर शाब्दिक प्रहार केल्याने चांगलीच वादळी ठरली. नियोजन नसल्यानेच अध्यक्षा रश्‍मी बर्वे यांना सभेत येता आले नसल्याचा विरोधकांनी लगावले टोला सत्ताधाऱ्यांच्या चांगलाच जिव्हारील लागला. तर प्रत्युतरात बांगड्या भरून घरी बसल्याने तुम्ही सुरक्षित राहिले असा थेट आरोप सत्ताधाऱ्यांनी केला. त्यामुळे सभागृहात प्रचंड गोंधळ उडाला. 

शुक्रवारी वनामतीच्या सभागृहात झालेल्या सभेत पतीमुळे होम क्वारंटाईन असल्याने अध्यक्ष रश्‍मी बर्वे अनुपस्थित होत्या. त्यामुळे उपाध्यक्ष मनोहर कुंभारे यांच्याकडे अध्यक्षपदाची धुरा देण्यात आली. सभेला सुरवात होताच अवंतिका लेकुरवाले यांनी करोना काळात जिल्हा परिषदेच्या आरोग्य विभागाने उत्तम काम केल्याचा दावा केला.

नागपुरात पुन्हा लॉकडाऊन? निर्णयासंदर्भात तुकाराम मुंढेंचे एकला चलो रे!

यावर भाजपचे गट नेते अनिल निधान यांनी अध्यक्षांच्या अनुपस्थितीवरून ते लक्षात येते, असा टोला लगावला. त्यामुळे कॉंग्रेसचे सदस्य चांगलेच भडकले. अध्यक्ष कुंभारे यांनी आमचे कॉंग्रेसचे नेते आणि जिल्हा परिषदेतील पदाधिकारी कोरोना काळातही जनतेच्या कल्याणासाठी बाहेर फिरतात, भाजपचे नेते घरात बांगड्या भरून बसलेत. त्यामुळे त्यांना काही नाही असे प्रत्युत्तर दिले. याची लाज वाटली पाहिजे', असेही सुनावले. त्यावर कोरोना वाढल्याची लाज तुम्हालाच वाटली पाहिजे, असे निधान म्हणाले. यावरून दोन्ही सदस्य एकमेकांसमोर ठाकले. 

निधान यांच्या सक्षम येत "आमचे नेते बाहेर फिरतात म्हणूनच त्यांना लागण झाली, तुमच्या नेत्यांसारखे नाही', असे दुधाराम सव्वालाखे म्हणाले. यामुळे सभागृहात बराच काळ विरोधक आणि सत्ताधाऱ्यांमध्ये बाचाबाची झाली. दोन्हीकडील सदस्यांनी आपल्या जागावरून उठून घोषणा दिल्या. सत्ताधारी सदस्यांनी अध्यक्षांची माफी मागण्याची मागणी केली. सलील देशमुख, शांता कुमरे इतर सदस्यांच्या मध्यस्थीनंतर प्रकरण शांत झाले. 

कुभारेंचे कौशल्य 
पिठासीन अध्यक्ष मनोहर कुंभारे हे एकटेच विरोधकांना सामोरे गेले. त्यांनी एकाही अधिकाऱ्याला उत्तर देण्यास सांगितले नाही किंवा उभे केले नाही. सभापतींनाही बोलण्याची संधी दिली नाही. विरोधकांनी केलेल्या आरोपाला आपले कौशल्य, अनुभवाच्या आधारे एकट्यांनेच उत्तर दिले. 

शिक्षकमित्र नेमा 
कोरोनाच्या संक्रमणामुळे ग्रामीण भागात शिक्षणाची अवस्था अतिशय गंभीर झाली आहे. त्यामुळे कृषी मित्राच्या धर्तीवर ग्रामीण भागात शिक्षक मित्राची नेमणुक करावी. गावातील डी.एड., बी.एड. झालेल्या मुलांना शिक्षकांच्या सहयोगातून व 15 व्या वित्त आयोगाच्या निधीतून त्यांना मानधन द्यावे, असा मुद्दा जि.प. सदस्य शांता कुमरे यांनी उपस्थित केला. 

फिजिकल डिस्टन्सिंगचा विसर 
कोरोना संक्रमणाच्या काळात वनामतीच्या सभागृहात जिल्हा परिषदेची सभा पार पडली खरी, पण सरकार, पक्ष, नेते यावरून सभागृहात झालेल्या वादातून सदस्य एकमेकांना भिडले. सरकारने केलेली कामे आणि सरकार कशी अपयशी ठरली यावरून शाब्दिक हल्ला चढवताना एकमेकांना समोर उभ ठाकले. फिजिकल डिस्टन्सिंगचाही त्यांना विसर पडला. 

राष्ट्रवादीची कॉंग्रेस सदस्याला समज देण्याची सूचना 
सभागृह सुरू होताच कॉंग्रेस सदस्या अवंतिका लेकुरवाळे यांनी आपल्या लांबलचक विषयासह बोलण्यास सुरूवात केली. त्यांच्या मुद्दावरून वादही निर्माण झाला. अध्यक्षांनीही त्यांना झुकते माप दिले. नवीन आलेल्या सदस्यांना बोलू द्या, असे आवाहन राष्ट्रवादीच्या सदस्यांकडून वारंवार होत होती. अखेर राष्ट्रवादीचे गटनेते चंद्रशेखर कोल्हे यांनी नाराजी व्यक्त करीत, लेकुरवाळे यांना मुद्देसद बोलण्याची समज देण्याची सूचना अध्यक्षांकडे केली.