नागपूर : कामठीतील गँगस्टर रणजित सफेलकर हा आणखी एका हत्याकांडाचा मास्टरमाईंड असल्याचे उघड झाले आहे. त्यामुळे आता पोलिस नवीन गुन्हा दाखल करण्याच्या तयारीला लागले आहे. विशाल पैसाडेली असे खून झालेल्या युवकाचे नाव आहे. त्याचा सफेलकर आणि राजू बद्रेने खून करून अपघात झाल्याचा बनाव केला होता.

२२ मार्च २००७ मध्ये विशाल पैसाडेली (३२, रा. कमसरी बाजार, कामठी) याचा मौदा वाळेगाव शिवारात कारच्या अपघातात मृत्यू झाला होता. या प्रकरणी खापरखेडा पोलिस ठाण्यात अपघाताचा गुन्हा दाखल झाला होता. यातील आरोपी कारचालक गौरव झाडे याला अटक करण्यात आली होती. त्याने कारचे ब्रेक फेल झाल्याने अपघात झाल्याची कबुली दिली होती. मात्र, हा अपघात नसून सफेलकर आणि राजू बद्रे यांनी घडवून आणलेले हत्याकांड असल्याचे उघडकीस आले आहे.

अधिक वाचा - नितीन गडकरी यांचा इशारा कोणाला? गटबाजी फोफावल्याचे केले मान्य

विशालचे सफेलकरच्या पत्नीशी मैत्री होती. त्या दोघांचे संबंध रणजितला खटकत होते. त्यामुळे त्याने विशालला ठार मारण्याचा कट रचला. आरोपी संजय बद्रे, श्रीकांत ऊर्फ भैया सांभारे, हेमंत गोरखा आणि तुषार दलाल यांनी विशालला वाळेगाव परिसरात ठार केले. त्याच्या अंगावरून स्कॉर्पीयो नेली आणि अपघाताचा बनाव केला. 

गौरवला केला बळीचा बकरा

सफेलकर आणि राजू बद्रेने विशालचा खून केल्यानंतर गौरव झाडे याला कारचालक म्हणून आरोपी होण्यास सांगितले. मात्र, गौरवने नकार दिला. त्यामुळे सफेलकरने त्याला ठार मारण्याची धमकी दिली. त्यामुळे गौरव तयार झाला. सफेलकरने अपघात झाल्याचा बनाव करीत गौरवला सरेंडर करण्यास सांगितले. त्याबदल्यात सफेलकरने गौरवला ५० हजार रुपये आणि न्यायालयीन खर्च उचलल्याचे आमिष दाखवले.

महत्त्वाची बातमी - चोर पावलांनी कमी होतो शरीरातील ऑक्सिजन; पन्नाशी ओलांडलेल्या ७० टक्के कोरोना रुग्णांना ऑक्सिजनची गरज

कायदेविषयक घेण्यात येणार सल्ला

२००७ ला घडलेल्या या हत्याकांडात अपघाताचा बनाव झाला असून त्यामध्ये आरोपी गौरव झाडे निर्दोष सुटला आहे. त्यामुळे हत्याकांडाचा नव्याने गुन्हा दाखल करण्यात येणार असून तपास करण्यात येणार आहे. त्यासाठी कायदेविषयक सल्ला, न्यायालयीन परवानगी आणि अन्य बाबींवर विचार करण्यात येणार असल्याची माहिती सूत्रांनी दिली आहे.