नागपूर - आता कोरोना चाचणीसाठी (corona testing) एखाद्या व्यक्तीचे नाक किंवा तोंडातून स्वॅब घेण्याची गरज भासणार नाही. येथील राष्ट्रीय पर्यावरण अभियांत्रिकी संशोधन केंद्राने (NEERI) यावर नवीन पर्याय शोधून काढला आहे. या नव्या संशोधनानुसार आता कोरोना चाचणीसाठी व्यक्तीच्या थुंकीचे नमुने वापरले जातील. भारतीय वैद्यकीय संशोधन परिषदेने (ICMR) या संशोधनाला मान्यता दिली आहे. या नव्या निदान पद्धतीमुळे वेळ आणि खर्च दोन्हीची बचत होईल. (saline water gargle useful for corona testing says neeri)
कोरोनाच्या दुसऱ्या लाटेत मोठ्या प्रमाणात चाचण्या वाढल्या असून अहवाल यायला देखील तीन ते चार दिवसांचा कालावधी लागतो आहे. त्यामुळे रुग्णांवरील उपचारास देखील विलंब होताना दिसतो. वेळेत निदान न झाल्याने आणि उपचारही न मिळू शकल्याने अनेकांचा मृत्यू होत असल्याची धक्कादायक बाब उघड झाली आहे. या सगळ्या गोंधळामध्ये टेस्टिंग लॅबवर देखील मोठा ताण येताना दिसतो, यामुळे आरोग्य यंत्रणाही मेटाकुटीला आली आहे.

अशी आहे पद्धत
‘निरी’ ने तयार विकसित केलेल्या नव्या चाचणी पद्धतीमध्ये व्यक्तीला सलाईनमध्ये वापरले जाणारे ग्लुकोज तोंडात घेऊन त्याच्या गुळण्या करण्यास सांगितले जाते. ही गुळणी नंतर एका बाटलीमध्ये साठविण्यात येते. पुढे याच थुंकीचा वापर आरटीपीसीआर टेस्टसाठी केला जातो. या चाचणीतून केवळ तीन तासांतच एखाद्या व्यक्तीला कोरोना आहे किंवा नाही ते समजू शकते.

या नव्या निदान पद्धतीमुळे चाचण्यांसाठी लोकांच्या रांगा लागणार नाहीत. शिवाय नाक आणि तोंडातून देखील स्वॅब घ्यावा लागणार नाही.या संशोधनामुळे लोकांचा वेळ आणि पैसा दोन्ही वाचू शकेल. लवकरात लवकर याची अंमलबजावणी सुरू होणे गरजेचे आहे. सुरूवातीच्या टप्प्यात देशभरातील पाचशे लॅबमध्ये या पद्धतीचा उपयोग केला जाणार आहे.
- कृष्णा खैरनार, शास्त्रज्ञ, निरी