नागपूर : महाराष्ट्र आणि नागपुरात कोरोनाची स्थिती गंभीर झाली आहे. त्यातच रेमडिसिव्हीर इंजेक्शनचा काळाबाजार होत आहे. त्यामुळे केंद्रीय मंत्री नितीन गडकरी यांनी रेमडिसिव्हीर इंजेक्शनचे उत्पादन वाढविण्याची विनंती पंतप्रधान नरेंद्र मोदी आणि केंद्रीय मंत्री मनसुख भाई मांडवीय यांना केली होती. ती मान्य करण्यात आली.

हेही वाचा - कुख्यात गुंडाच्या तब्बल सात शाळा, गुन्हेगारीच्या पैशातून उघडल्या शिक्षण संस्था

रेमडिसिव्हीर या इंजेक्शनची निर्मिती करण्यासाठी आता आणखी सात कंपन्यांना केंद्र सरकारने परवानगी दिली आहे. पंतप्रधान नरेंद्र मोदी आणि केंद्रीय मंत्री मनसुख भाई मांडवीय यांची आज गडकरींनी दिल्लीत भेट घेतली. या इंजेवशनचे उत्पादन आता १० लाख व्हायल प्रतिमाह याप्रमाणे 7 ठिकाणी बनविण्यात येणार आहे. आतापर्यंत शहराला सात हजार १५० रेमडिसिव्हीर इंजेक्शन मिळाले आहेत. सात हजार इंजेक्शन आणखी येणार आहेत. रेमडिसिव्हीर उत्पादनाचे पेटंट चार कंपन्यांकडे आहे. या चार कंपन्या युध्दस्तरावर औषध निर्मिती करीत आहेत. पण आवश्यक तेवढा पुरवठा त्या करू शकत नाही. यासाठी पेटंटचा कायद्यातील कलम ८४ काही काळासाठी शिथिल करण्यासाठ़ी गडकरी यांनी पंतप्रधानांना पत्र पाठविले व आज प्रत्यक्ष पंतप्रधानांची भेट घेतली. हा कायदा शिथिल झाला तर आंतरराष्ट्रीय दर्जाचे औषध तयार करणाऱ्या काही कंपन्यांना हे औषध बनविण्याची परवानगी देता येईल. यासाठीसुद्धा गडकरी यांनी ड्रग कंट्रोलर ऑफ इंडिया यांच्याशीही मंगळवारी संपर्क केला होता.