नागपूर : इंदिरा गांधी शासकीय वैद्यकीय महाविद्यालय व रुग्णालयात (मेयो) उपचारासाठी दाखल असलेल्या सत्तर वर्षीय कोरोनाबाधित रुग्णाचा बुधवारी मृत्यू झाला. उपराजधानीत कोरोनाच्या विषाणूमुळे झालेला हा दुसरा मृत्यू असून यामुळे प्रशासन खळबळून जागे झाले आहे. सध्या शहरात कोरोनाबाधित रुग्णांची संख्या 133 आहे. तर मृतांचा आकडा दोन झाला आहे. 

उपराजधानीत 5 एप्रिल रोजी 68 वर्षीय व्यक्तीचा कोरोनामुळे पहिला मृत्यू झाला होता. यानंतर तब्बल 25 दिवसानंतर दुसऱ्या मृत्यूची नोंद झाली. मोमीनपुरा येथील रहिवासी असून त्याला मेयो रुग्णालयात उपचारासाठी दाखल करण्यात आले होते. संपर्कातून या व्यक्तीला कोरोनाची बाधा झाली होती.

- आता तरी थांबावे हे व्यसन, खर्‍यामुळे हे गाव बनले आहे ’हॉटस्पॉट’ 
 

समुदाय प्रादुर्भावाने उपराजधानीला धक्का 
विशेष बाब अशी की, नागपुरातील कोरोनाच्या पहिला बळी ठरला होता त्याला तसेच बुधवारी झालेल्या दुसऱ्या कोरोनाच्या बाधेने दगावलेल्या रुग्णाला कोणत्याही विदेशी किंवा इतर शहरातील प्रवासाची पार्श्वभूमी नव्हती. शिवाय मरकजमधील कार्यक्रमातही गेलेला नाही. त्यामुळे दोन्ही मृत्यू हे समुदाय प्रादुर्भावाचे बळी ठरले, असे म्हणता येईल.