नागपूर : समाजसेवी शंकरबाबा पापडकर यांची मानस कन्या वर्षा आणि अनाथालय बालगृहातील समीर यांचा विवाह सोहळा आज (रविवारी ता. २०) सायंकाळी पाच वाजता पोलिस लाइन टाकळी येथील सद्‍भावना लॉन येथे आयोजित करण्यात आला आहे. 

हेही वाचा - ‘डेटिंग ॲप’वरून चॅटिंगचा फास; खाजगी बाबी व्हायरल...

गृहमंत्री अनिल देशमुख व पत्नी आरती देशमुख हे मुलीचे कन्यादान करणार असून नवरा मुलगा समीर याच्या वरपित्याची जबाबदारी जिल्हाधिकारी रवींद्र ठाकरे व त्यांच्या पत्नी ज्योत्स्ना ठाकरे यांनी स्वीकारली आहे. मतिमंद व मूकबधिर अनाथ मुलांच्या संगोपन व पुनर्वसनासाठी कार्य करणारे ज्येष्ठ समाजसेवक शंकरबाबा यांना २३ वर्षांपूर्वी नागपूर रेल्वे स्टेशनवर बेवारस अवस्थेत वर्षा आढळली होती. सहा वर्षांची झाल्यानंतर शिक्षणासाठी संत गाडगेबाबा निवासी मूकबधिर विद्यालय येथे चौथीपर्यंत शिक्षण देऊन स्वत:च्या पायावर उभे केले. दुसरीकडे डोंबिवली येथे बेवारस स्थितीत सापडलेल्या दोन वर्षांच्या समीरला शंकरबाबा यांनी स्वत:चे नाव देऊन सांभाळ केला. सातव्या वर्गापर्यंत शिक्षण पूर्ण केल्यानंतर स्वावलंबी जीवन जगता यावे यासाठी नोकरी मिळवून दिली. 

हेही वाचा - Success Story: आता क्यूमॅथच्या सहाय्यानं हसत खेळत सोडवा गणिताचे प्रश्न; नागपूरच्या...

गृहमंत्री देशमुख यांनी बालगृहाला भेट दिली असता दोघांच्या विवाहाचा प्रस्ताव ठेवून संमती मिळाल्यानंतर कन्यादान करण्याचे त्यांनी मान्य केले. कोरोना संदर्भात राज्य सरकारने ज्या अटी घालून दिलेल्या आहेत त्या अटींना पाळून या विवाह सोहळ्यात नागरिकांनी उपस्थित राहून वधूवरांना आशीर्वाद द्यावेत, असे आवाहन देशमुख यांनी केले आहे. या मूकबधिर दांपत्यास संसारोपयोगी साहित्य दिले तर मला आनंदच होईल देशमुख म्हणाले.