- अखिलेश गणवीर

नागपूर - तुम्ही भर पावसात एसटीने प्रवास करीत असाल तर आधी बसच्या छतावर लक्ष द्या. ज्या ठिकाणी ताडपत्री सारखे ‘पॅचेस’ लावलेले दिसतील, तेथील आसनावर सांभाळूनच बसा. अन्यथा बसमध्ये डोक्यावर छत्री घेण्याची वेळ येऊ शकते. अशीच स्थिती सध्या बहुतांश गाड्यांची झाली आहे. छताच्या गळतीवर तात्पुरता उपाय म्हणून ताडपत्री सारखे पॅचेस लावलेले दिसत आहेत.

वेळ संध्याकाळी ५ वाजताची. नागपूर-तिरोडा मार्गावर धावणारी बस गणेशपेठ मध्यवर्ती स्थानकावर उभी होती. पावसाच्या पाण्याची गळती रोखण्यासाठी बसच्या छताला ताडपत्री सारखे ‘पॅचेस’ लावले होते. स्टीकर सारखी ही पट्टी छताला चिकटविण्यात येते. त्यामुळे गळतीची तात्पुरती सोय होते.

मात्र, पुन्हा काही दिवसांनी हे ‘पॅचेस’ निघतात. त्यातून पुन्हा पाणी गळते. गळतीवर हा कायमचा उपाय नाही. एसटी महामंडळाच्या बहुतांश बसेसची स्थिती अशीच झाली आहे. अशा ‘पॅचेस’ लावलेल्या बहुतांश गाड्या दिसतात. त्यामुळे प्रवाशांना छत गळतीचा सामना करावा लागत आहे.

हवेत उडणाऱ्या छतातून तरी धडा घ्यावा

काही दिवसांपूर्वी गडचिरोली-अहेरी या बसचे छत चक्क हवेत उडाल्याची चित्रफित समाजमाध्यमात व्हायरल झाली होती. महामंडळाने याची दखल म्हणून अभियंत्यावर नाहक कारवाई केली. तसेच अहेरी आगाराच्या बसमध्ये सुद्धा भर पावसात चालक एका हातात स्टेअरिंग तर दुसऱ्या हाताने वायपर फिरवत असल्याचे व्हायरल व्हीडिओमधून पुढे आले होते.

त्यामुळे खिळखिळ्या बसची पावसाळ्यात वाट कठीण असल्याचे पुढे येत आहे. जुन्या गाड्यांमुळे देखभाल-दुरुस्तीवर मोठा खर्च महामंडळाला होत आहे. मात्र, तरीही बहुतांश गाड्यांमध्ये देखभाल-दुरुस्तीचा अभाव आहे. याचा परिणाम प्रवाशांवर होत आहे.

बहुतांश बसेस खिळखिळ्या झाल्या आहेत. खराब रस्त्यावरून गाडी धावताना बॉडी हलते. त्यामुळे छत गळतीवर लावण्यात आलेले पॅचेस निघून जातात. पॅचेस ही केवळ मलमपट्टी आहे. पावसाळ्यात हा प्रश्न गंभीर आहे. दहा वर्षापेक्षा जास्त आयुमर्यादा ओलांडलेल्या गाड्यांना बाद केले पाहिजे.

- श्रीरंग बरगे, सरचिटणीस- महाराष्ट्र एसटी कर्मचारी काँग्रेस