नागपूर : 1 सप्टेंबर 2014 चा दिवस नागपूरकरांना हादरवूस सोडणारा होता. दोन आरोपींनी शहरातील एका चिमुकल्याचा निर्घूण खून केल्याची बातमी कानावर पडल्याने नागपुरात चांगलीच खलबळ उडाली होती. सर्वोच्च न्यायालयाने या प्रकरणीतील दोन्ही आरोपींची फाशीची शिक्षा रद्द करून त्यांना आजन्म कारावासाची सुधारित शिक्षा ठोठावली आहे. आरोपींना मरेपर्यंत कारागृहात ठेवण्यात यावे आणि त्यांना 25 वर्षे कारावास भोगल्याशिवाय शिक्षामाफी देण्यात येऊ नये, असे न्यायालयाने निर्णयात स्पष्ट केले आहे.

राजेश धन्नालाल दवारे (27) व अरविंद अभिलाष सिंग (28) अशी प्रकरणातील आरोपींची नावे असून राजेश कळमन्यातील वांजरी ले-आऊट, तर अरविंद जरीपटक्यातील प्रीती ले-आऊट येथील रहिवासी आहे. आरोपी राजेश हा युगचे वडील डॉ. मुकेश चांडक यांच्या रुग्णालयात कर्मचारी होता. युग नेहमीच रुग्णालयात जात होता. एक दिवस राजेशने युगला थापड मारली होती. परिणामी, डॉ. चांडक राजेशवर रागावले होते. याशिवाय राजेश रुग्णांकडून अतिरिक्त पैसे वसूल करीत होता. यासंदर्भात अनेक रुग्णांनी डॉ. चांडक यांच्याकडे तक्रार केली होती. त्यामुळे, डॉ. चांडक यांनी राजेशला कामावरून काढून टाकले होते. त्याचा राग राजेशच्या मनात होता.

त्यातून त्याने आरोपी अरविंदसोबत मिळून खंडणीसाठी युगचे अपहरण व हत्या करण्याचा कट रचला. 1 सप्टेंबर 2014 रोजी आरोपींनी युगला दुचाकीवर बसवून कोराडी रोडने निर्जण ठिकाणी नेले व तेथे त्याची हत्या केली होती. या प्रकरणी सत्र न्यायालयाने 4 फेब्रुवारी 2016 रोजी भादंविच्या कलम 364 - अ (खंडणीसाठी अपहरण) अंतर्गत मरेपर्यंत फाशी,  कलम 302 (हत्या) अंतर्गत मरेपर्यंत फाशी व कलम 201 (पुरावे नष्ट करणे) अंतर्गत सात वर्षे सश्रम कारावास आणि पाच हजार रुपये दंड अशी शिक्षा ठोठावली होती. त्या निर्णयाला आरोपींनी मुंबई उच्च न्यायालयाच्या नागपूर खंडपीठात आव्हान दिले होते.

- मुंबई उच्च न्यायालयाच्या मुख्य न्यायमूर्तिपदी न्यायमूर्ती दत्ता 

तसेच, सरकारने फाशीची शिक्षा कायम करण्याचे प्रकरण उच्च न्यायालयात सादर केले होते. त्यानंतर उच्च न्यायालयाने सत्र न्यायालयाचा निर्णय कायम ठेवून आरोपींचे अपील फेटाळले. त्यामुळे, आरोपींनी सर्वोच्च न्यायालयात अपील दाखल केले. याप्रकरणी शुक्रवारी सर्वोच्च न्यायालयाने निकाल देत दोन्ही आरोपींची फाशीची शिक्षा रद्द करून आजन्म कारावासाची शिक्षा सुनावणी.

सर्वोच्च न्यायालयात राज्य सरकारतर्फे वरिष्ठ वकील मुकुल रोहतगी, फिर्यादी डॉ. मुकेश चांडकतर्फे अ‍ॅड. राजेंद्र डागा व अ‍ॅड. राहील मिर्झा तर आरोपींतर्फे अ‍ॅड. युग चौधरी व अ‍ॅड. अजितसिंग पुंदीर यांनी कामकाज पाहिले.