नागपूर : रितिका उर्फ रितू मालूची पोलिस कोठडी (पीसीआर) आणि जामीन अर्ज या दोन्ही प्रकरणांवर एकाच न्यायपीठासमक्ष सुनावणी घ्यावी, या विनंतीसह फिर्यादीने मुख्य जिल्हा व सत्र न्यायाधीशांकडे अर्ज दाखल केला. त्यामुळे आजची सुनावणी उद्या (ता. ५) पर्यंत तहकूब करण्यात आली.

रामझुला येथे २४ फेब्रुवारी घडलेल्या या मर्सीडीज कार अपघात प्रकरणात दोघांचा मृत्यु झाला होता. तहसील पोलिसांचा तपास निष्पक्ष नसल्याने अपघातातील मृतकांच्या कुटुंबीयांची मागणी मान्य करीत उच्च न्यायालयाने तपास सीयआडीकडे हस्तांतरित केला. त्यानंतर २५ सप्टेंबर रोजी सत्र न्यायालयाने तिला दिलेला जामीन रद्द केला. पोलिसांनी २६ सप्टेंबरच्या पहाटे रितूला अटक केली.

नियमानुसार महिलेला रात्री अटक करता येत नाही. मात्र, रितू पळून जाण्याची शक्यता नकारता येत नाही, असे सांगत तिला रात्रीच अटक करण्याची परवानगी देण्यात यावी, अशी मागणी सीआयडीने प्रथम श्रेणी न्यायदंडाधिकारी ए.व्ही. खेडकर-गरड यांच्याकडे केली होती. अपवादात्मक स्थिती लक्षात घेता न्यायालयाने सीआरपीसीच्या कलम ४६ अंतर्गत रितुला सूर्यास्तानंतर व सूर्यास्तापूर्वी अटक करण्याची परवानगी दिली. त्यानुसार सीआडीने तिला रात्री अटक केली.

सीआयडीला बजावली नोटीस

या प्रकरणातील असाधारण घडामोडी लक्षात घेत न्या. सुराणा यांनी स्वत:हून पुनर्विचार अर्ज दाखल करवून घेतली. या प्रकरणी देण्यात आलेल्या निर्णयाची अचूकता, वैधता आणि औचित्य यासंबंधीची पडताळणी करवून घेण्यासाठी ही प्रक्रिया केली जात असल्याचे न्यायालयाने आपल्या आदेशात स्पष्ट केले आहे. या प्रकरणी सीआयडीला नोटीस पाठविण्यात आली असून सीडीआयने आपले उत्तर सादर करणे अपेक्षित आहे.