नागपूर - शहरातील मॅनहोल स्वच्छतेसाठी आता रोबोटचा वापर करण्यात येणार आहे. नागपूर स्मार्ट ॲन्ड सस्टेनेबल सिटी डेव्हलपमेंट कार्पोरेशनने रोबोट खरेदी करण्याचा निर्णय घेतला असून संचालक मंडळाने मंजूरही केला. त्यामुळे शहरातील सफाई कामगारांना मोठा दिलासा मिळणार आहे.

स्वच्छता आणि देखभाल करण्यासाठी सफाई कर्मचाऱ्यांना मॅनहोल्समध्ये प्रवेश करावा लागतो. आता प्रगत तंत्रज्ञानाचा वापर करून शहरातील मॅनहोल्सच्या देखभालीमध्ये अधिक सुरक्षितता आणण्यासाठी स्मार्ट सिटीने पाऊल उचलले आहे. स्मार्ट सिटीच्या संचालक मंडळाच्या नुकताच झालेल्या बैठकीत हा निर्णय घेण्यात आला. बैठकीला स्मार्ट सिटीचे मेंटॉर आणि चेअरमन डॉ. संजय मुखर्जी मुंबईहुन ऑनलाइन उपस्थित होते.

महानगरपालिकेचे आयुक्त व प्रशासक राधाकृष्णन बी, संचालक मंडळ सदस्य अनिरुद्ध शेनवाई, आशिष मुकीम, नागपूर स्मार्ट सिटीचे मुख्य कार्यकारी अधिकारी चिन्मय गोतमारे, कंपनी सेक्रेटरी भानुप्रिया ठाकूर आणि मुख्य वित्त अधिकारी नेहा झा उपस्थित होते. सध्या केंद्र शासनाच्या आदेशाप्रमाणे मॅन्युअल स्कॅव्हेंजिंगवर बंदी घालण्यात आली आहे. नागपूर महानगरपालिकेकडे १० जेटींग मशीन आणि ४ सक्शन मशीन आहेत. रुंद रस्‍त्याव सिवेज चेंबरची स्वच्छता करण्यास मदत होते, पण अरुंद रस्त्यावर हे करणे अडचणीचे ठरते. या समस्येवर तोडगा काढण्यासाठी रोबोटद्वारे स्वच्छता प्रणालीची मदत होणार आहे. आयओटीवर आधारित हे स्कॅव्हेंजिंग रोबोट लहान रस्त्यावर किंवा गल्ल्यांमध्ये सुद्धा सिवेज चेंबरच्या स्वच्छेतेत मदत करेल, असे मुख्य कार्यकारी अधिकारी चिन्मय गोतमारे यांनी सांगितले.

पोहरा नदीवर एसटीपी

नागपूर स्मार्ट सिटीतर्फे हुडकेश्वर-नरसाळा भागात पोहरा नदीवर २० एमएलडी क्षमतेचे सांडपाणी प्रक्रिया प्रकल्प (एसटीपी) उभारण्याचा प्रस्तावही बैठकीत मांडण्यात आला. संचालक मंडळाने या एसटीपी प्रकल्पालाही मान्यता दिली. या माध्यमातून पोहरा नदी प्रदूषणमुक्त करण्याच्या प्रयत्न असल्याचे गोतमारे यांनी सांगितले.