नागपूर : पतीला उपचारासाठी नागपुरात घेऊन आलेल्या एका महिलेचे दवाखाना परिसरातून चोरट्यांनी दीड लाख रुपये चोरून नेल्याची घटना स्नेहनगर येथील सरस्वती हॉस्पिटल येथे उघडकीस आली. 

हेही वाचा - महाराष्ट्रात सध्या ’हनीमून सरकार’; आमदार मदन येरवारांचा महाविकास आघाडी सरकारवर निशाणा  

घुग्गुस (जि. चंद्रपूर) येथील अनिल ठाकुरवार हे शिक्षक आहेत. ठाकुरवार यांना मूत्रपिंडाचा त्रास आहे. त्यामुळे १० फेब्रुवारी रोजी पत्नी रजनी आणि भाचा अनुप अरुण वदवलवार (३८) यांच्यासोबत स्नेहनगर येथील सरस्वती हॉस्पिटल येथे उपचारासाठी आले होते. ठाकुरवार यांना दवाखान्यात भरती केल्यानंतर त्यांची पत्नी रजनी या दवाखाना परिसरातच राहत होत्या. 

शनिवारी रात्री ९ वाजताच्या दरम्यान त्या दवाखाना परिसरात हजर असताना अज्ञात चोरांनी त्यांची बॅग उघडून दीड लाख रुपये असलेली छोटी पर्स चोरून नेली. हा प्रकार रजनी यांच्या लक्षात आला नाही.

हेही वाचा - ‘मुलांनो, आम्हाला माफ करा; आमचे मृतदेह मेडिकल कॉलेजला दान करा’ अशी चिठ्ठी लिहून दाम्पत्याची...

रात्री नऊच्या सुमारास औषधीसाठी त्यांना पैसे द्यायचे असल्याने त्यांनी बॅग उघडली असता त्यांना पर्स दिसून आली नाही. संपूर्ण बॅग शोधून काढली परंतु, पर्स मिळाली नाही. पैसे चोरीला गेल्याचे लक्षात येताच एकच गोंधळ उडाला. लगेच त्यांनी प्रतापनगर पोलिस ठाणे गाठून पोलिसांना माहिती दिली. याप्रकरणी प्रतापनगर पोलिसांनी चोरीचा गुन्हा नोंदवून तपास सुरू केला आहे. पोलिसांनी दवाखाना परिसरातील सीसी फुटेज ताब्यात घेतले असून त्यादिशेने पोलिस तपास करीत आहेत.