मांढळ (जि. नागपूर) : कुही तालुक्यातील आकोली येथील ६९ वर्षीय शाहीर शिवशंकर डोमाजी गजभिये हे वयाच्या २५ व्या वर्षांपासून समाजप्रबोधनाचे कार्य करतात. मात्र, कलावंतांना मिळणाऱ्या मानधनापासून ते अद्यापही वंचित असल्याची खंत ‘सकाळ’ प्रतिनिधीजवळ व्यक्त केली.

कुहीजवळच्या रेल्वेफाटकाजवळ असलेले आकोली या गावी २ एप्रिल १९५१ रोजी शाहीर शिवशंकर यांचा जन्म झाला. महामानव डॉ. बाबासाहेब आंबेडकर यांचा धम्मदीक्षा सोहळा त्यांनी वडिलांच्या खांद्यावर बसून बघितल्याचे ते सांगतात. बेताची परिस्थिती असूनसुद्धा बाबासाहेब आंबेडकर यांच्या प्रेरणेतून पदवीपर्यंतचे शिक्षण शाहीर शिवशंकर यांनी नागपुरातून पूर्ण केले.

अधिक वाचा - २४ वर्षांपूर्वी रेल्वेस्थानकावर सापडलेल्या 'वर्षा'चं गृहमंत्री अनिल देशमुख करणार कन्यादान

गायनाची आवड असल्याने गुरू दामाजी गजभिये यांच्या मार्गदर्शनात भजनमंडळ तयार केले. त्या माध्यमातून गावोगावी जाऊन छत्रपती शिवाजी महाराज, शाहू महाराज, महात्मा फुले, डॉ. बाबासाहेब आंबेडकर, राष्ट्रसंत तुकडोजी महाराज, संत गाडगे महाराज आदी महामानावांच्या विचारांचा प्रचार व प्रसार ते गेल्या ४५ वर्षांपासून करीत आहेत.

स्वच्छता अभियान, अंधश्रद्धा निर्मूलन, हुंडाबळी कायदा, दारुबंदी, महात्मा गांधी तंटामुक्त गाव आदी सरकारच्या उपक्रमाचा प्रसार व प्रचार ते गीतगायंनाच्या माध्यमातून करीत आहेत. विदर्भात खेड्यात जाऊन हे कार्य अविरतपणे करीत आहेत. बुद्ध जयंती, भीमजयंती, शिवाजी महाराज जयंती, महात्मा गांधी जयंती, गोपाळकाला, भागवत सप्ताह अशा प्रसंगी ते समाजप्रबोधन करतात. त्यांच्या गायन कलेचे कौतुक करीत डॉ. बाबासाहेब आंबेडकर संगीत पुरस्कार, विदर्भ कलाकार परिषद पुरस्कार, महाराष्ट्र लोकशाहीर परिषदेचा पुरस्कार असे दोनशेपेक्षा जास्त पुरस्कार त्यांना आतापर्यंत मिळालेले आहेत.

सविस्तर वाचा - बापरे! घराच्या मागेच लपून होता वाघ, सरपण आणायला जाताच महिलेवर केला हल्ला

माजी केंद्रीय मंत्री विलासराव मुत्तेमवार, माजी मंत्री राजेंद्र मुळक, खासदार कृपाल तुमाणे, माजी आमदार सुधीर पारवे, जिल्हा परिषदेतर्फे प्रशस्तीपत्र देऊन या शाहीर कलावंताचा सन्मान केला आहे. एवढेच नव्हे तर शाहीर शिवशंकर यांनी ३० वर्षे कुही पोलिस ठाण्यात होमगार्ड म्हणून सेवा दिली. आता त्यांच्याकडून उतारवयात एक रुपयाही मिळत नसल्याची तीव्र नाराजी शिवशंकर गजभिये यांच्या मनात आहे.

सरकारकडून मानधन मिळावे
४५ वर्षे गायन कलेच्या माध्यामातून समाजप्रबोधन केले. तसेच समाजातील लग्नविधी लावण्याचे कार्यही केले. आता वयाच्या उत्तरार्धात सरकारकडून मानधन मिळावे म्हणून चारवेळा सांस्कृतिक कार्य संचालनालय, महाराष्ट्र शासन, विस्तार भवन मुंबई यांच्याकडे कागजपत्रांसह अर्ज केलेत. मात्र, काहीही उपयोग झाला नाही.
- शाहीर शिवशंकर

संपादन - नीलेश डाखोरे