नागपूर : परकीय चलनाची देवाण-घेवाण व विदेशी पर्यटनाच्या क्षेत्रात व्यावसायिक गुंतवणूक केल्यास मोठ्या प्रमाणावर मोबदला मिळवून देण्याचे आमिष दाखवून शहरातील दोन व्यापाऱ्यांची पावणे दोन कोटींनी फसवणूक केल्याची बाब उघडकीस आली आहे. यात शहरातील गोयल कुटुंबातील सहा जणांसह एकूण सात आरोपींविरूद्ध गुन्हा दाखल करण्यात आला आहे. 

हेही वाचा - मातृत्व अनुभवण्यापूर्वीच झाला बाळाचा मृत्यू, महिलेचं कृत्य पाहून उपस्थितांचेही पाणावले डोळे

देवेंद्र गोविंद गोयल, रितेश गोविंद गोयल, गोविंद मुरारीलाल गोयल, निकीता देवेंद्र गोयल, अनिता गोविंद गोयल, जितेंद्र मुरारीलाल गोयल सर्व रा. गोविंद भवन, रामदासपेठ आणि पायल सोमानी रा. भक्तीसागर को ऑपरेटिव्ह सोसायटी, आंबेडकर चौक अशी आरोपींची नावे सांगण्यात येतात. पोलिस सूत्रांच्या माहितीनुसार आरोपींचा श्री हॉलिडेज नावाने ट्रॅव्हलींग हॉलिडेज बुकिंग, इंटरनॅशनल ट्रॅव्हल्स, परकीय चलन बदलून देण्याचा व्यवसाय आहे. या व्यवसायात गुंतवणूक केल्यास मोठ्या प्रमाणावर नफा मिळवून देण्याचे आमिष त्यांनी संपर्कातील व्यापाऱ्यांना सांगितले होते. वाडीच्या लिली लाइफ स्टाइल सोसायटीतील रहिवासी सुरेशचंद्र अग्रवाल (७३) यांनी गुंतवणुकीची तयारी दाखविली. विश्वास बसावा यासाठी आरोपींनी आरबीआयचे बनावट लायसन्स दाखविले. ऑगस्ट २०१६ पासून दोन्ही पक्षांमध्ये वाटाघाटी सुरू झाल्या. अग्रवाल यांनी गोयल यांच्याकडे ५९ लाख रुपये गुंतवले. पण, कोणताही परतावा न देता फसवणूक केली. 

हेही वाचा - आता प्रदेशाध्यक्षपदही विदर्भालाच, काँग्रेसचा 'हात' विदर्भाच्याच डोक्यावर का? वाचा स्पेशल...

मस्कासाथ, इतवारी येथील रहिवासी आशिष जैन यांनी दिलेल्या तक्रारीनुसार, देवेंद्र गोयल, रितेश गोयल, गोविंद गोयल, निकिता गोयल यांनी संपर्क साधून व्यावसायिक गुंतवणुकीसाठी भाग पाडले. डिसेंबर २०१४ ते फेब्रुवारी २०१८ दरम्यान बँकेमार्फत व रोख स्वरूपात एकूण २ कोटी २९ लाख ९० हजार रुपये घेतले. व्यवसायात नफा झाल्याचे सांगून १ कोटी १६ लाख ८१ हजार ५०० रुपये परतही दिले. उर्वरित १ कोटी १३ लाख ८ हजार ५०० रुपये अद्यापही दिले नाहीत. प्रत्यक्ष व फोनवरून मागणी करूनही पैशांची परतफेड केली नाही. दोन्ही प्रकरणांमध्ये अंबाझरी व तहसील पोलिसांनी फसवणुकीचा गुन्हा नोंदवीत पुढील तपास सुरू केला आहे.