एकलहरे : राज्यातील वीज केंद्रे सहा महिन्यांच्या कालावधीत दुसऱ्यांदा कोळसा तुटवड्याचा सामना करीत आहेत. कोळसा तुटवड्यामुळे चंद्रपूरचे दोन संच बंद ठेवण्यात आले असून, बाकी संच निम्म्याहून कमी क्षमतेने वीज निर्मिती करीत असल्याचे चित्र आहे.कोरोना काळात गेल्या दोन वर्षात जास्तीत जास्त काळ नागरिकांना घरी थांबवण्यात व वर्क फ्रॉम होमसाठी मदत करण्यात यशस्वी ठरलेल्या वीज कंपनीचे तीनही भाग निर्मिती, पारेषण व वितरण यांचे योगदान महत्वाचे ठरले होते.

मात्र, पावसाळ्यात महानिर्मितीला कोळसा तुटवड्याचे ग्रहण लागले. त्यातून सावरत नाही, तोच आता पुन्हा कोळसा तुटवड्याला सामोरे जावे लागत असून, चंद्रपूर येथील संच क्रमांक तीन व चार बंद ठेवावे लागले आहे. तर औष्णिकची निर्मिती क्षमता ९ हजार ५४० मेगा वॅट असताना ५ हजार ४१८ मेगा वॅट निर्मिती सुरू आहे. नाशिक औष्णिक वीज केंद्राची क्षमता ६३० मेगा वॅट एक संच झिरो शेड्युलमध्ये बंद दोन संचांमधून २२४ मेगा वॅट, कोराडी क्षमता २१९० मेगा वॅट व निर्मिती १७११ मेगावॅट, खापरखेडा क्षमता १३४० मेगा वॅट, तर संच २ व ४ तांत्रिक कारणास्तव बंद, निर्मिती ५७६ मेगा वॅट सुरू, पारस क्षमता ५०० मेगा वॅट निर्मिती २६५ मेगा वॅट, परळी क्षमता ७५० मेगा वॅट, निर्मिती ५०३ मेगा वॅट, चंद्रपूर क्षमता २९२० मेगा वॅट व दोन संच बंद, १ हजार ७७७ मेगा वॅट निर्मिती सुरू, भुसावळ क्षमता १२१० मेगा वॅट व निर्मिती ४६९ मेगा वॅट याप्रमाणे औष्णिकची ५ हजार ४१८ मेगा वॅट वीजनिर्मिती सुरु होती.

खासगी मात्र जोमात

एकीकडे कोळसा तुटवड्यामुळे महानिर्मितीला दोन संच बंद ठेवावे लागल्याचे दिसत असताना खासगी जिंदाल- ५८५ मेगा वॅट, अदाणी- ३ हजार १७४ मेगा वॅट, रतन इंडिया- १ हजार २०९ मेगा वॅट, एसडब्लूजीपीएल- ३४६ मेगा वॅट, धाडीवाल- २८९ मेगा वॅट अशी जोमात वीज निर्मिती सुरू होती.

चंद्रपूर ते डब्लूसीएल कंपनी दरम्यान कोळसा वहन करणाऱ्या रोप वेमध्ये बिघाड झाल्याने दोन संच बंद ठेवण्यात आले होते. दोन दिवसांत परिस्थिती पूर्ववत्‌ होईल.

-पुरुषोत्तम जाधव, संचालक, कोळसा खनिकर्म