नागपूर : रात्री साडेदहाची वेळ... तिशीतील महिला तीन मुलांना घेऊन गांधीसागर तलाव परिसरात अस्वस्थपणे फिरत होती... दोन युवकांचे तिच्या हालचालींकडे लक्ष गेले... ही महिला अचानक तलावाच्या दिशेने लगबगीने निघाली... ती मुलांसह पाण्यात उडी घेण्याच्या तयारीत होती... दोघांनीही धावत तिला गाठले. मुलांना पकडले आणि तिला रोखले... पोलिसांना फोन केला आणि ताब्यात दिले... समुपदेशन केल्यानंतर चुकीची जाणीव महिलेला झाली. ते दोन्ही युवक महिला आणि मुलांसाठी देवदूत ठरले. (Two-youths-save-life-a-woman-and-three-children)

गणेशपेठ पोलिस ठाण्याच्या हद्दीत राहणारी ३० वर्षीय महिला पतीच्या त्रासाला कंटाळली होती. बेरोजगार आणि दारूडा पती रोज मारहाण करीत होता. तीन चिमुकल्यांना आधार देण्यासाठी ती पतीचा त्रास सहन करत होती. मात्र, सततच्या त्रासाला ती कंटाळली होती. १८ जूनला रात्री नऊ वाजता दारूच्या नशेत पतीने तिला जबर मारहाण केली. त्यामुळे तिच्या मनात आत्महत्येचे वादळ घोंगावू लागले.

तीन मुलांच्या भविष्याची चिंता सतावत असल्याने तिने मुलांसह आत्महत्या करण्याचा निर्णय घेतला. रात्री साडेदहा वाजता घराबाहेर पडून मुलांसह तिने गांधीसागर तलाव गाठला. लगबगीने तलावाच्या दिशेने निघाली. याच वेळी तेथे शतपावली करणारे कुणाल झाडे आणि अभिनव ढोबळे यांनी ती दिसली.

मुलांसह आत्महत्येच्या प्रयत्नात असलेल्या महिलेच्या दिशेने दोघांनीही धाव घेतली. कुणालने मुलांना तर अभिनवने महिलेला अडवले. तिची समजूत घातली. तिने आपबिती सांगितली. त्यांनी गणेशपेठ पोलिसांना माहिती देत महिला आणि मुलांना त्यांच्या ताब्यात दिले. समुपदेशन केल्यानंतर महिलेला कुटुंबीयांच्या स्वाधीन करण्यात आले.

(Two-youths-save-life-a-woman-and-three-children)