नागपूर : सध्या संपूर्ण जगावर कोरोनाचे गंभीर संकट घोंघावत आहे. अशात सोशल मीडियाच्या माध्यमातून अनेक जनजागृतीपर मेसेज फिरत आहेत. यासोबतच काही दिशाभूल करणारे मेसेज देखील हेतुपुरस्सररित्या पाठवण्यात येत असल्याचे पुढे आले आहे.

अनेकदा समाजाची श्रद्धा आणि अंधश्रद्धा या दोब बाबतीत गफलत होताना पाहायला मिळते. कोरोनाचा वाढता प्रादुर्भाव लक्षात घेता काही समाज कंटकांनी आपला हेतू यातूनसुद्धा साध्य करण्याचे काम सुरू केले आहे. गोमूत्र, लवंग आणि शेण खाल्याने कोरोना होत नाही, असा अजब आणि हास्यास्पद दावा ही मंडळी करत असल्याचे महाराष्ट्र अंधश्रद्धा निर्मुलन समितीचे राज्य प्रधान सचिव मिलिंद देशमुख यांनी "दै. सकाळ'शी बोलताना सांगितले. 

हे भोंदू लोकांचा भोळेपणाचा आणि अशिक्षितपणाचा फायदा घेत असे हास्यास्पद विधाने करतात. अमुक-अमुक मंत्र म्हटल्यास तुम्हाला कोरोना होणार नाही, कोरोनाला दूर ठेवण्याच्या दृष्टीने आमच्या कडील तेल विकत घ्या, अग्निहोत्र करीत होम करा, लवंग जाळा अशा थोतांड बाबी कोरोनाने भयभीत नागरिकांना सांगत अंधश्रद्धा पसरवित आहेत. मात्र, त्यांचा हा दावा ते आजवर सिद्ध करू शकले नाही. यासाठी अनेक नागरिक एकत्रित येत यज्ञ करीत आहेत. मुळात, कोरोनापासून बचावासाठी नागरिकांनी समुहाने एकत्रितही यायला नको, असेही देशमुख म्हणाले.

- अरे व्वा, किती छान! एसटी बसमधून करायला मिळणार आता राजासारखा प्रवास!

अफवांपासून दूर रहा 
खबरदारीचे उपाय म्हणून प्रशासनाने ज्या ज्या उपाययोजना केल्या आहेत त्याला नागरिकांनी सहकार्य करावे. कोरोना आजार झालेल्यांसह त्यांच्या परिवाराला बहिष्कृत करु नये. कायद्यानुसार अशा लोकांवर गुन्हा देखील दाखल होऊ शकतो. आपण या संकटाचा एकजुटीने सामना करायला हवा. नागरिकांनी अफवा आणि अंधश्रद्धेचा बळी पडू नये. 
- मिलिंद देशमुख, राज्य प्रधान सचिव, महाराष्ट्र अंधश्रद्धा निर्मुलन समिती.