नागपूर  : महाविद्यालयात एकेकाळी नियमित क्‍लास व्हावेत, यासाठी पालक आग्रही असत. काळाच्या ओघात "क्‍लास'ची जागा आता भरगच्च क्‍लासेसनी घेतली. क्‍लासेसमध्ये जाण्यासाठी विद्यार्थी महाविद्यालयातील "क्‍लास' बुडवायला लागले आहेत. कोरोनाच्या प्रादुर्भावामुळे सध्यातरी नियमित वर्ग घेता येणे शक्य नसले तरीही नियमित वर्ग होणारे कॉलेज नकोच अशाच भूमिकेत पालक असल्याचे दिसत आहे.

दहावीच्या निकालानंतर अकरावी प्रवेशाची प्रक्रिया आता सुरू झाली. चांगल्या महाविद्यालयात प्रवेशासाठी पालकांची चढाओढ सुरू झालेली असताना नियमित अभ्यासक्रम शिकविणाऱ्या महाविद्यालयांकडे खुद्द पालकांनीच पाठ फिरविल्याचे धक्कादायक चित्र समोर येत आहे. क्‍लासेसशिवाय विद्यार्थ्यांची प्रगती नाही, असा विचार मनात ठेवून गेल्या दोन वर्षांत पालकांनीच नियमित "क्‍लास' बंद पाडून क्‍लासेसचे वर्ग "फुल्ल' करण्याचा पवित्रा अवलंबिला.

हे काय! ग्रामीण भागातील कॉलेज जोमात,, विद्यार्थ्यांचा वाढता कल.. पण कारण काय.. वाचा

याची प्रचिती बड्या महाविद्यालयांत होणाऱ्या प्रवेशानंतर दिसून येते. शहरातील एका बड्या महाविद्यालयात तर पालकांनीच नियमित वर्ग न घेण्याचे विनंतीपत्र पाठविले असल्याचे समजते. त्यामुळे अशा महाविद्यालयातील प्राचार्यांची चिंता वाढली आहे. विज्ञान व वाणिज्य शाखेत अशी उदाहरणे नित्याचीच बाब आहे. विशेष म्हणजे ऑनलाइन प्रवेश प्रक्रिया सुरू झाल्याने बऱ्याच विद्यार्थ्यांनी क्‍लासेसच्या माध्यमातून ग्रामीण भागात प्रवेश घेतल्याचे निदर्शनास येते.

नुकसान विद्यार्थ्यांचेच
महाविद्यालयात नियमित क्‍लासमध्ये शिकविण्यात येणाऱ्या विषयांमध्ये विद्यार्थ्यांना विषयाव्यतरिक्त इतरही ज्ञान मिळत असते. याशिवाय अनुभवी प्राध्यापकांचे अनुभव त्यांच्या कामात येतात. मात्र, क्‍लासेसमध्ये केवळ विषयांवर चर्चा होऊन त्यानुषंगाने हवे ते व्यावहारिक ज्ञान मिळत नाही. त्यामुळे परीक्षांमध्ये ज्ञानाचा फायदा होत असला, तरी वास्तविक जीवनात त्याचा उपयोग होत नाही.

प्राचार्य हतबल
महाविद्यालयांमध्ये नियमित क्‍लास घेण्याची कितीही इच्छा असली, तरी त्याची प्रभावीपणे अंमलबजावणी करण्यात प्राचार्य हतबल झालेले आहेत. महाविद्यालयात प्राध्यापकांना शिकविण्याचे कामच उरले नाही. अशा परिस्थितीत काय करावे, असा प्रश्‍न प्राचार्यांना पडत आहे.