नागपूर : राज्यात अकरावी प्रवेश ऑनलाइन पद्धतीने होत आहेत. मात्र, या प्रवेश प्रक्रियेपेक्षा कनिष्ठ महाविद्यालयांचा विश्‍वास खासगी शिकवणी वर्गांवर अधिक असल्याचे दिसून येत आहे. क्‍लासमधील विद्यार्थ्यांचे अधिकाअधिक प्रवेश मिळावेत यासाठी कनिष्ठ महाविद्यालयातील प्राचार्यांसह संस्थाचालक मोठ-मोठ्या शिकवणी वर्गासमोर लोटांगण घालत असल्याची माहिती समोर आली आहे. त्यामुळे यंदाही अकरावीची प्रवेश प्रक्रिया नाममात्र ठरण्याची चिन्हे आहेत.

शिकवणी वर्गांवर आळा बसावा यासाठी राज्यभरातील पाच शहरांमध्ये दोन वर्षांपासून अकरावी प्रवेशाची ऑनलाइन प्रक्रिया सुरू करण्यात आली. सध्या त्यासाठी नोंदणी प्रक्रिया सुरू आहे. मात्र, या प्रक्रियेला छेद देत क्‍लासेसमधून अकरावीसाठी महाविद्यालयांमध्ये प्रवेश झाल्याचे चित्र दिसून आले. याचा अनेक नामवंत महाविद्यालयांना फटका बसला.

यावर्षी कसा साजरा होणार स्वातंत्र्यदिन? शाळांमध्ये ध्वजारोहण करण्याबाबत विभागीय शिक्षण उपसंचालकांनी दिल्या या महत्वाच्या सूचना

आता निकालात वाढ झाली आहे. तसेच मेरीटही वाढले. मात्र, यावर्षी कुठलीही जोखीम न घेता छोट्या कनिष्ठ महाविद्यालयांपासून तर शहरातील बड्या कनिष्ठ महाविद्यालयांनी कंबर कसली आहे. त्यामुळे शहरातील नामवंत महाविद्यालयांतील प्राचार्य आणि संस्थाचालक खासगी शिकवणी वर्ग चालविणाऱ्यांकडे जाऊन प्रवेशासाठी विनवणी करत आहेत. शहरातील काही नामवंत कनिष्ठ महाविद्यालयांची तपासणी केल्यास हे तथ्य निश्‍चित बाहेर येईल.

क्‍लास ठरवितात प्रवेश
दहावीनंतर ‘करिअर‘ साठी खासगी शिकवणी वर्गाकडे पालकांची धाव असते. त्यामुळे महाविद्यालय कुठले असले तरी शिकवणी वर्ग चांगला असावा असाच पालकांचा कल आहे. यामुळे अकरावीचे वर्ग सुरू होण्याआधीच खासगी शिकवणी वर्गांमध्ये पालकांची गर्दी असते. याचा फायदा घेत शिकवणी वर्ग घेणारे कुठला विद्यार्थी कुठे प्रवेश घेईल, हे ठरते.