नागपूर  : राष्ट्रसंत तुकडोजी महाराज नागपूर विद्यापीठाशी संलग्नित असलेल्या नामांकित महाविद्यालयांसह इतर महाविद्यालयांमधील प्रवेशाची प्रक्रिया सुरू करण्यात आली आहे. त्यानुसार विद्यापीठाने वीस टक्के वाढीव जागांसाठी प्रस्ताव सादर करण्याचे आवाहन केले. मात्र, यावर्षी कोरोनामुळे विद्यार्थी प्रवेश घेतील का ? या भितीने एकाही महाविद्यालयाने जागा वाढीसाठी प्रस्ताव सादर केले नाही.

गेल्यावर्षी नियमित शिक्षक नसल्याचे कारण देत, बऱ्याच महाविद्यालयातील अभ्यासक्रमांवर प्रवेशबंदी घातली. यामध्ये ग्रामीण भागासह शहरातील शंभराहून अधिक महाविद्यालयांचा समावेश आहे. यामुळे पदवीच्या प्रथम वर्ष प्रवेशाला नामांकित महाविद्यालयांमध्ये प्रवेशासाठी बरीच मोठी "वेटींग लिस्ट'असल्याने विद्यार्थी प्रवेशापासून वंचित असल्याचे चित्र होते. विद्यार्थ्यांचा बीएससी., बीकॉमकडे वाढलेला कल पाहता अनेक विद्यार्थ्यांना प्रवेश मिळणे अशक्‍य झाले.

हे काय! ग्रामीण भागातील कॉलेज जोमात,, विद्यार्थ्यांचा वाढता कल.. पण कारण काय.. वाचा

काही नामवंत महाविद्यालयांमध्ये दोन ते तीन हजार विद्यार्थ्यांची "वेटींग लिस्ट' होती. त्यामुळे वीस टक्के वाढीव जागा लवकर मिळाव्या अशी मागणी महाविद्यालयांनी केली होती. विद्यार्थ्यांनीही यासाठी प्रशासनाकडे निवेदन सादर करीत जागा वाढ करण्याची मागणी होती. त्यामुळे विद्यापीठ प्रशासनाद्वारे महाविद्यालयांकडून प्रस्ताव मागविण्यात आले होते. यावर्षीही अशाच साठी विद्यापीठाने संकेतस्थळावर नोटीफिकेशन टाकून प्रस्ताव मागविले होते. मात्र, कोरोनामुळे पदवी प्रवेशात विद्यार्थी मिळतील का? हा मोठा प्रश्न आहे. त्याचाच धसका घेत एकाही महाविद्यालयाने प्रस्ताव पाठविला नसल्याचे समजते.

मागील वर्षी दीडशे महाविद्यालयांचे प्रस्ताव
राष्ट्रसंत तुकडोजी महाराज नागपूर विद्यापीठाच्या पदवी प्रवेशाची प्रक्रिया सुरू आहे. गेल्यावर्षी विद्यार्थ्यांची बरीच मोठी "वेटींग लिस्ट' असल्याने दीडशेहून अधिक महाविद्यालयांनी वीस टक्के वाढीव जागांच्या मागणीसाठी प्रस्ताव सादर केले होते. यापैकी जवळपास १०३ हुन अधिक महाविद्यालयांना वीस टक्के वाढीव जागा देण्याचे विद्यापीठाने मान्य केले होते. आता यावर्षी कोरोनाच्या भितीने एकाही महाविद्यालयाने प्रस्ताव सादर केले नाही.