नागपूर : भीम आर्मी सामाजिक संघटनेतर्फे आयोजित कार्यकर्ता मेळाव्याला परवानगी का नाकारली, अशी विचारणा मुंबई उच्च न्यायालयाच्या(mumbai high court) नागपूर खंडपीठाने(nagpur bench) राज्य शासनाला केली. सहाय्यक पोलिस आयुक्तांनी परवानी नाकारल्यानंतर भीम आर्मी संघटनेने नागपूर खंडपीठात याचिका दाखल केली.याप्रकरणी न्यायमूर्ती नितीन सांबरे यांच्या समक्ष सुनावणी झाली. याचिकेनुसार, भीम आर्मी (bheem army )संघटनेतर्फे कार्यकर्ता मेळाव्यासह कोरेगाव-भीमा(koregaon bhima) शहिदांना आदरांजली अर्पण करण्याचा कार्यक्रम आयोजित केला आहे.

रेशीमबाग मैदानावर(reshimbaug ground) ‘प्रबोधन गीते व मानवंदना’ या नावाने १ जानेवारी २०२२ रोजी आयोजित केला आहे. विशेष शाखेच्या सहायक पोलिस आयुक्तांनी कायदा व सुव्यवस्थेच्या कारणावरून या कार्यक्रमाला परवानगी नाकारली. याबाबत २२ डिसेंबर रोजी आदेश जारी करण्यात आला आहे. १५ नोव्हेंबर २०२१ रोजी महानगरपालिकेने, २३ नोव्हेंबर २०२१ रोजी वाहतूक विभागाने आणि ७ डिसेंबर २०२१ रोजी नागपूर सुधार प्रन्यासने परवानगी दिली. कोरेगाव-भीमा लढाईतील शहिदांचे स्मरण करण्यासाठी दरवर्षी हा कार्यक्रम आयोजित केला जातो. गेल्या वर्षी २२ फेब्रुवारीला रेशीमबाग मैदानावर हा कार्यक्रम झाला होता. त्या कार्यक्रमाला उच्च न्यायालयाच्या आदेशानंतर सशर्त परवानगी देण्यात आली होती. असे असताना यावर्षी पुन्हा परवानगी नाकारण्यात आली. पोलिस प्रशासनाचा हा आदेश अवैध व एकतर्फी आहे. आदेश जारी करण्यापूर्वी सुनावणीची संधी देण्यात आली नाही. त्यामुळे, न्यायालयाने आदेश रद्द करून कार्यक्रमाला परवानगी द्यावी, असे याचिकाकर्त्यांचे म्हणणे आहे.