मी वाचलेलं पुस्तक - प्लेझर बॉक्स (लेखक - व. पु. काळे)

लीना फलके ढेंगे (उपजिल्हाधिकारी, भंडारा)

World Book Day 2024 : प्लेझर बॉक्स हे पुस्तक व. पु. काळे यांनी आपल्या वाचकांना लिहिलेल्या पत्र संवादाचा उत्तम नमुना आहे. यातील काही वाचकांना व. पु. प्रत्यक्ष भेटलेले आहेत. तर काही वाचकांनी केवळ त्यांची पुस्तके वाचलेली आहेत. व. पु. काळे यांची अनेक पुस्तके ही मानवी दैनंदिन जीवनातील घटनांवर मानसोपचारिक पद्धतीने केलेली विश्‍लेषण आहेत. त्यांचं आकलन विचारप्रवृत्त करणारं आहे. त्यांच्या कोणत्याही पुस्तकातील उतारा वाचत असताना वाचक स्वतःभोवती घडणाऱ्या घटना त्या चित्रणात पाहायला लागतो.

त्यातूनच मग व. पु. त्यांना आपल्या मनातील गोष्टी शेअर करण्यायोग्य व्यक्ती अथवा निकटवर्ती वाटायला लागतो. म्हणूनच हे पुस्तक अंतर्मनाचा वेध घेणारे आहे. मनाचा मनाशी होणारा संवाद म्हणजे पत्र, जी आजच्या काळात कालबाह्य होतात की काय अशा धास्तावलेल्या स्थित्यंतरात सापडलेली आहेत.

पुस्तकातून काय प्रेरणा मिळते?

स्मार्टफोन, इंटरनेट, समाजमाध्यमांच्या, रील्स आणि यूट्युब अशा आधुनिक साधनांच्या गराड्यात माणूस माणसाला संवादाशी पारखा झालेला आहे. फोनद्वारे संवाद होत असल्याने पत्र तर आज दूरची गोष्ट झाली आहे. गेली कित्येक वर्ष लोकांनी पत्रच लिहिलेली नसतील हे सर्वव्यापी कटू सत्य आहे.

एकेकाळी दहा दहा पानांची पत्रे मी माझ्या मैत्रिणींना लिहित असे. त्यातून मन मोकळं व्हायला आणि आपल्या मनाची कवाडं व त्यात काय दडलयं हे समजायला हे माध्यम पुन्हा मी स्वतःसाठी खुलं केलं आहे. पुस्तके, ग्रंथ, लेख, कविता हे वाचण्याची आवड निर्माण होण्यासाठी पत्र लिहिण्याची संस्कृतीचे पुनरुज्जीवन करणे आज गरजेचे झाले आहे. तरच वाचन संस्कृतीला बळ मिळेल.

माझं ऑल टाईम फेव्हरेट पुस्तक : एक होता कार्व्हर (लेखिका वीणा गवाणकर)

वाचलीच पाहिजे अशी पुस्तके :

१) कृष्णा काठ - यशवंतराव चव्हाण

२) शककर्ते शिवराय - विजयराव देशमुख

३) रानवाटा - मारुती चितमपल्ली

४) कृष्ण किनारा - अरुणा ढेरे