नागपूर  : जिद्द आणि संघर्षातून अशक्‍य गोष्ट साध्य करता येऊ शकते. 90 टक्केपेक्षा जास्त अंधत्व वाट्याला आल्याने मनातील शिकण्याची इच्छा न सोडता, आपल्यातील कमतरतेलाच आपली ताकद बनवित, असेच प्रेरणादायी यश इंडियन ऑलिंपियाड स्कूलच्या मोहम्मद फैजान नवीद सेट या दहावीतील विद्यार्थ्याने मिळविले आहे. यासाठी त्याने चक्क यू-ट्यूबचा आधार घेत, अभ्यास करीत 92 टक्के गुण मिळविले.

दृष्टी कमजोर असल्याने मोहम्मद फैजान काहीच वाचू शकत नव्हता. त्यामुळे त्याचे अंधत्व हे त्याच्या उज्ज्वल भविष्याला बाधा ठरेल असे अनेकांना वाटत होते. मात्र, मनात असलेल्या इच्छाशक्तीला मेहनतीचे बळ देत, मोहम्मद फैजानने अभ्यासास सुरुवात केली. वाचू न शकल्याचे शल्य त्याच्या मनात होते. यासाठी मित्र आणि नातेवाइकांना वारंवार त्रास कशाला द्यायचा या विचाराने त्याने शक्कल लढविली. त्याने शाळेतील अभ्यासासोबतच "यू-ट्यूब'वरील अभ्यासक्रमांच्या व्हिडिओचा आधार घेत, त्याने अभ्यासास सुरुवात केली.

आकांक्षांपुढती गगन ठेंगणे! दुर्धर आजारावर मात करून तळपला रवी, बारावीत 91 टक्‍के!

यासाठी त्याच्या कुटुंबीयांची बरीच मदत झाली. अनेकदा त्यात व्यत्ययही आला. कधी मनात चिडचिड निर्माण होत असल्याने अभ्यासात एकाग्रता ठेवणे कठीण व्हायचे. मात्र, या संकटावर संयमाने मात करून त्याने दहावीची परीक्षा दिली. आता समोर बायोजेनेटीक मेकॅनिकल इंजिनिअरिंगमध्ये प्रवेश घेण्याचे स्वप्न तो बघतो आहे. त्यातून इतरांचे जीवन समृद्ध करण्याचा त्याचा ध्यास आहे. त्याने मिळविलेले डोळस यश खरोखरच अनेकांना प्रेरणादायी ठरणारे आहे. त्याने आपल्या यशाचे श्रेय वडील नवीद सेट आणि आई शाहिस्ता सेट यांच्यासह शाळेतील शिक्षकांना दिले आहे.