भंडारा : कोरोनाचा वाढता प्रादुर्भाव लक्षात घेता देशभरातील टाळेबंदीमुळे 105 दिवसांपासून बंद असलेले पर्यटनस्थळे पर्यटकांसाठी खुले झाले. मात्र, सोयीसुविधांच्या अभावामुळे नवेगाव-नागझिरा व्याघ्रप्रकल्पाच्या पर्यटनावरील बंदी कायम ठेवण्यात आली आहे. यामुळे एक ऑक्‍टोबरपर्यंत नवेगाव-नागझिरा व्याघ्रप्रकल्प "लॉकडाउन' राहणार आहे. 

कोविड 19 च्या प्रादुर्भावामुळे महाराष्ट्रातील व्याघ्रप्रकल्प, राष्ट्रीय उद्याने आणि अभयारण्यात निसर्ग पर्यटनाला बंदी घातली होती. हा काळ नेमका पर्यटनासाठी महत्त्वाचा असतो. या बंदीमुळे हजारो पर्यटकांचा हिरमोड झाला तर वन्यजीव विभागाच्या महसुलाचेही बरेच नुकसान झाले. याशिवाय पर्यटनावर अवलंबून असलेल्या स्थानिक लोकांच्या रोजगार हिरावला गेला. 

हे वाचा— पैशासाठी विकला पोटचा गोळा; एवढ्या रुपयांत झाला होता सौदा, पण...

देशात आणि राज्यामध्ये काही प्रमाणात लॉकडाउनचे निर्बंध शिथिल करण्यात आल्याने व्याघ्रप्रकल्पातील निसर्ग पर्यटन मर्यादित स्वरूपात सुरू करण्यास मंजुरी मिळाली आहे. विदर्भातील ताडोबा-अंधारी, पेंच व्याघ्रप्रकल्पाच्या बफर क्षेत्रात 1 जुलैपासून पर्यटनाला सुरुवात झाली आहे. केवळ बफर क्षेत्रात मर्यादित स्वरूपात पर्यटनाला परवानगी देण्यात आली.

या निर्णयामुळे भंडारा-गोंदियातील नवेगाव-नागझिरा व्याघ्र प्रकल्पातील पर्यटनही सुरू होईल, अशी अपेक्षा होती. परंतु, या प्रकल्पात कोविड 19 साठी आवश्‍यक सोयीसुविधा नसल्याने याठिकाणी तूर्तास तरी पर्यटन सुरू करणे शक्‍य होणार नाही, असे वन्यजीव विभागाचे स्पष्ट केले आहे. या व्याघ्रप्रकल्पातील पर्यटन पावसाळ्यानंतर 1 ऑक्‍टोबरपासून नेहमीप्रमाणे सुरू होणार आहे. 

उमरेड-पवनी-कऱ्हांडला अभयारण्य खुले 
राज्यात अनलॉक-2 सुरू झाल्याने स्थानिकांना रोजगार उपलब्ध होण्याच्या दृष्टिकोनातून राष्ट्रीय व्याघ्र प्राधिकरण, नवी दिल्ली यांच्या मार्गदर्शक सूचनेनुसार उमरेड-पवनी-कऱ्हांडला अभयारण्य पर्यटकांसाठी खुले करण्यात आले आहे. सामाजिक अंतराचे नियम पाळून पर्यटकांना पर्यटनाचा लाभ घेता येणार आहे.