अमरावती : कोरोना विषाणू संसर्ग प्रतिबंधासाठी उपाययोजनांना गती मिळावी यासाठी संत गाडगेबाबा अमरावती विद्यापीठातील केंद्रीय उपकरणीकरण कक्ष येथे कोरोना चाचणी लॅब कार्यान्वित करण्यात आली आहे.
 
सोमवारी 24 संशयितांचे अहवाल चाचणीसाठी या प्रयोगशाळेत पाठविले आहेत. विद्यापीठात कोरोना निदान चाचणी केंद्र सुरू झाल्याने संसर्ग प्रतिबंधासाठी संशयितांचे अहवाल तत्काळ मिळण्यास मदत होणार आहे. विद्यापीठाच्या प्रयोगशाळेतून अहवाल तत्काळ मिळणार असल्यामुळे उपचार जलदगतीने करणे आता शक्‍य होणार आहे. अमरावती जिल्ह्यातून कोरोना हद्दपार करण्याच्या प्रयत्नांना यामुळे बळ मिळणार असून, उपायांना गती येईल व अमरावतीकरांना दिलासा मिळणार आहे.
 
पालकमंत्री यशोमती ठाकूर यांनी लॅब सुरू होण्यासाठी प्रत्येक टप्प्यावर प्रयत्न केले. बायोसेफ्टी गाईडलाईन्स व महाराष्ट्र प्रदूषण नियंत्रण मंडळ कोविड-19 करिता असलेल्या मार्गदर्शक तत्त्वानुसार लॅबला मान्यता प्रदान झाली आहे.

विद्यापीठातील या प्रयोगशाळेत एका दिवसाला सुमारे शंभर नमुने तपासले जाणार असून त्याचा अहवाल त्याच दिवशी मिळणार आहे. या लॅबमध्ये चार खोल्या सलग टेस्टिंगकरिता असून सुरक्षिततेचे सर्व उपाय योजण्यात आले आहेत.

- एका चुकीमुळे नातेवाईकांना सहा दिवस कराव लागली अंत्यसंस्कारासाठी प्रतीक्षा

सोमवारी या प्रयोगशाळेत क्षमतेनुसार 24 नमुने पाठविन्यात आलेले आहेत. लॅब सेटअप झाल्यानंतर नमुण्याची संख्या वाढविली जाईल. सुरुवातीचे दोन-चार दिवस विद्यापीठातील लॅबचे पॉझिटिव्ह अहवाल क्रॉस चेकिंगसाठी अखिल भारतीय आयुर्विज्ञान संस्थेत (एम्स, नागपूर) पाठविले जातील. त्यासोबतच प्रलंबित नमुने संख्या नियंत्रणात येईपर्यंत नागपूर, अकोला, सेवाग्राम येथे पाठविणे सुरूच राहील, असे जिल्हाधिकारी शैलेश नवाल यांनी सांगितले. डॉ. पंजाबराव देशमुख मेडिकल कॉलेज हॉस्पिटलमध्येही लॅब सुरू होण्याच्या दृष्टीने प्रयत्न होत आहेत, अशी ग्वाही पालकमंत्री ऍड. ठाकूर यांनी दिली.