यवतमाळ : यवतमाळ जिल्हा परिषदेच्या बांधकाम आणि शिक्षण व आरोग्य सभापतींविरोधात शुक्रवारी (ता. ३) बोलावलेल्या विशेष सभेत अविश्वास पारित झाला. या घटनेने आता जिल्हा परिषदेतील राजकारण अधिक तापणार असण्याची चर्चा आहे.

यवतमाळ जिल्हा परिषदेत काँग्रेस, राष्ट्रवादी काँग्रेस व भाजपने शिवसेनेला दूर ठेवून अपक्षाच्या मदतीने सत्ता स्थापन केली होती. त्यात काँग्रेसला अध्यक्षपद, भाजपला उपाध्यक्ष, राष्ट्रवादी काँग्रेसला सभापतिपद मिळाले होते. तर अपक्षाला शिक्षण व आरोग्य सभापतिपदाची लॉटरिच लागली होती. परंतु, लोकसभा निवडणुकीदरम्यान 38 सदस्यांनी तीन सभापतीवर अविश्वास प्रस्ताव दाखल करून त्यांच्यावर निवडणूक प्रचारात सक्रिय होऊ नये, यासाठी अंकुश आणला होता.

आज, शुक्रवारी (ता. ३) या प्रस्तावावर मतदान घेण्यात आले.  त्यात बांधकाम सभापती निमिष मानकर (राष्ट्रवादी काँग्रेस पक्ष) यांच्या विरोधात 59 मते पडली, तर शिक्षण व आरोग्य सभापती नंदिनी दरणे (अपक्ष) यांच्या विरोधात 47मतांनी अविश्वास प्रस्ताव पारित झाला. मात्र, महिला व बालकल्याण सभापती अरूणा खंडाळकर (काँग्रेस) यांच्यावरील अविश्वास ठराव बारगळला.