चामोर्शी (गडचिरोली) : भारतावर दीडशे वर्ष राज्य करणाऱ्या इंग्रजांनी अनेक वास्तुंची निर्मिती केली. कारागृह, निवासी बंगले, विश्रामगृह, अनेक कार्यालय रेल्वे स्थानक पोस्ट'आॅफिसेस अशा अनेक वास्तु आजही इंग्रजी राजवटीची साक्ष देत उभ्या आहेत. विदर्भही त्याला अपवाद नाही. विदर्भातही अनेक इंग्रजकालिन वास्तु आहेत. हे बांधकाम इतके पक्के असायचे की त्या वास्तू आजही सुस्थित आहेत.

चामोर्शी तालुक्यातील आष्टी येथे १९२७ मध्ये ब्रिटिशांनी विश्रामगृहाची निर्मिती केली. मागील ९० वर्षांपासून हे विश्रामगृह उभे आहे. स्वातंत्र्यानंतर सार्वजनिक बांधकाम विभागाकडे विश्रामगृहाच्या देखभालीची जबाबदारी आली. काही वर्षांपूर्वी येथे मुलांना खेळायला झुले, रंगीबेरंगी फुलांचा बगीचा, झाडांची सावली आणि असंख्य पक्ष्यांचा वावर नैसर्गिक, असे वातावरण होते. परंतु आता या विश्रामगृहाकडे सार्वजनिक बांधकाम विभागाचे दुर्लक्ष होत असल्याने विश्रामगृहाची अवस्था दयनीय झाली आहे.

सविस्तर वाचा - विदर्भात पुन्हा येणार महापूर? इसापूर धरणातून पाण्याचा प्रचंड विसर्ग; विदर्भ-मराठवाड्याचा संपर्क तुटला

आष्टी येथील विश्रामगृहात काही वर्षांपूर्वी येथील कर्मचाऱ्यांसाठी निवासाची व्यवस्थासुद्धा शासनाकडून करण्यात आली होती. परंतु संबंधित विभागाने याकडे दुर्लक्ष करताच त्याचे कवेलू, दारे, खिडक्‍या चोरट्यांनी लंपास केल्या आहेत. विश्रामगृहासभोवताल वृक्ष-वेली वाढल्या आहेत. परिसरात कचरा उगवला आहे, विश्रामगृहातील मागील एका खोलीत पाणीसुद्धा गळते आहे, आता पिण्याच्या पाण्याचीसुद्धा सोय नाही. त्यामुळे ब्रिटिश काळापासून जपलेला वारसा नष्ट होतो की काय, अशी स्थिती निर्माण झाली आहे. सार्वजनिक बांधकाम विभागाने या विश्रामगृहाची दुरुस्ती व रंगरंगोटी करावी, अशी मागणी आष्टी परिसरातील नागरिकांकडून होत आहे.

संपादन - स्वाती हुद्दार