मोझरी (जि. अमरावती) : येथील हॉटेल व्यावसायिक शेख अफसर यांनी एक आगळावेगळा छंद जोपासला आहे. जगातील विविध देशांचे चलन संग्रहित करून हॉटेलच्या दर्शनी भागात लावले आहे. यामध्ये एक पैसा ते एक लाख रुपयांच्या नोटांचा समावेश आहे. तसेच चलनातून बाद झालेली नाणी अथवा नोटांचेसुद्धा संकलन असून, विविध देशांच्या चलनांची ही आगळीवेगळी नोटगॅलरी पर्यटक कुतूहलाने पाहताना दिसून येतात.

नागपूर-अमरावती महामार्गावर शेख बंधू यांचे हॉटेल आहे. त्यामुळे देशांतर्गत पर्यटक तसेच विदेशवारी करणाऱ्या पर्यटकांची येथे नेहमीच वर्दळ असते. साहजिकच आपापल्या देशातील चलन हे प्रत्येकासाठीच महत्त्वाचे असल्याने त्यांचा संग्रह करण्याचा छंद या हॉटेल व्यावसायिकाने जोपासला. सुरुवातीला आपल्याच देशातील व्यवहारातून बाद झालेल्या व नव्याने व्यवहारात चलनात आलेल्या नोटा व नाणी यांचा संग्रह करता करता इतर देशांच्या चलनाविषयी आकर्षक व आवड निर्माण झाली. आज एक दोन नव्हे, तर तब्बल ४० देशांच्या चलनाच्या नोटा व नाणी या छंदवेड्या तरुणाने आपल्या कॅश काउंटरवर सजवून ठेवली आहेत.

या देशांच्या चलनांचा संग्रह

अमेरिकेच्या डॉलरसह फ्रान्सचे फ्रेन्क, इटलीचे लीरा, अर्जेंटिनाचा पेसो, इराकचा दिनार, बांगलादेशचा टका, अफगाणिस्तानचा अफगाणी, चीनचा युआन, रशियाचा रुबल, ब्रह्मदेशचा क्यार, श्रीलंकेचा रुपी, जपानचा येन, दक्षिण आफ्रिकेचा रेंड, ब्राझीलचा रियाल, ब्रिटनचा पौंड, कॅनडाचा डॉलर, कोरियाचा वॉन, पाकिस्तानचा रुपया अशा एक ना अनेक देशांच्या चलनाचा संग्रह येथे पाहायला मिळतो.