सिंदखेड राजा - ओबीसी समाजाचा न्याय व हक्कासाठी व आरक्षण टिकवण्यासाठी ते कायम राहावे यासह विविध मागण्यासह ओबीसी बांधवांनी मातृतीर्थ सिंदखेड राजा येथे ओबीसी आरक्षणासाठी महामोर्चा काढून एल्गार करण्यात आला. यावेळी हजारोच्या संख्येत ओबीसी बांधव सहभागी झाले होते.

यावेळी राजमाता माँ जिजाऊ राजवाड्यासमोरून हा मोर्चा शहरांतील विविध भागातून निघाला. ओबीसी आरक्षण संदर्भातील घोषणांनी शहर दणाणून गेले होते. यावेळी विविध मागण्याचे निवेदन उपविभागीय अधिकारी समाधान गायकवाड यांना चिमुकल्या मुलीने व ओबीसी बांधवांनी दिले.

पुढे ओबीसी मोर्चे रूपांतर उपविभागीय विभागीय कार्यालयासमोर असलेल्या सावता भवन येथे सभेमध्ये रूपांतर झाले. यावेळी ओबीसी आरक्षण बचाव समन्वय समितीचे सदस्य भगवान सातपुते यांनी मराठा समाजाला ओबीसी मधून आरक्षण देवू नये अशी मागणी करून अंतरवाली सराती येथे ओबीसी नेते छगन भुजबळ यांचेवर अत्यंत खालच्या भाषेत टीका झाली हा प्रकार थांबला पाहिजे, शासनाने आमच्या नेत्यांविरोधात बोलणाऱ्या लोकांवर कारवाई करावी अशी मागणी केली. ओबीसी नेत्यांवरील सातत्याने होणारे आरोप यापूढे सहन करणार नसल्याचे त्यांनी सांगितले.

छगन भुजबळ यांचेवर होणारे गलिच्छ आरोप थांबले नाही तर जशास तसे उत्तर द्यायला, आम्ही ओबीसी देखील समर्थ असल्याचे ओबीसी मोर्चाचे समन्वयक संतोष खांडेभराड यांनी यावेळी सांगितले. यावेळी समन्वय समितीचे नागेश गवळी, जनार्दन मेहेत्रे, आकाश मोर्य, पूनम खंदारे यांनी ओबीसी समाजावर सातत्याने होत असलेल्या अन्यायाला वाचा फोडण्याची हीच वेळ असल्याचे सांगितले.

विदर्भ, मराठवाडयातून हजारोंचा सहभाग

मराठवाड्यातील जालना, बीड, परभणी, संभाजीनगर आदी जिल्ह्यांतून शेकडो ओबीसी समाजबांधव या मोर्चात सहभागी होण्यासाठी दाखल झाले होते. मराठवाड्यात सध्या मनोज जरांगे यांचे मराठा समाजाला आरक्षण मिळावे यासाठी आंदोलन सुरू आहे.

त्यांच्या परवा झालेल्या सभेत छगन भुजबळ यांच्यावर एकेरी भाषेत झालेल्या टीकेचा आजच्या ओबीसी मोर्चात चांगलाच समाचार घेण्यात आला. दरम्यान, जालना येथून १०० मोटारसायकलवरून २०० ओबीसी कार्यकर्ते मोर्चासाठी आले होते.

मोर्चात महिलांचा मोठा सहभाग

राजवाडा येथून सुरू झालेल्या मोर्चात विविध ठिकाणाहून आलेल्या महिलांचा मोठा सहभाग पहावयास मिळाला. देऊळगाव राजा येथील पूनम खंदारे या विद्यार्थिनीने ओबीसी विद्यार्थ्यांना येणाऱ्या अडचणी सांगून सर्वांचेच लक्ष वेचले.