अमरावती : तू मेरी नही तो किसी और कि भी नही हो सकती, किंवा तु है मेरी किरन... अशा फिल्मी घटनांचा प्रभाव तरुण वयात मनावर असतो आणि सामान्य आयुष्यातही हे तरुण चित्रपटातल्या हिरोसारखे वागू पाहतात. यातून अनेक गुन्हे घडतात. कधीकधी निष्पाप तरुणींचे आयुष्य दावणीवर लागते. अशीच एक घटना नुकतीच अमरावतीमध्ये घडली.

तिच्यासाठी तो वाट्टेल ते करायला तयार होता. परंतु तिने मात्र दुस-यासोबत लग्न केले. त्यामुळे चिडलेल्या टवाळखोराने तिच्या घरी जाऊन तिला रिव्हॉल्हरचा धाक दाखविला. जबर मारहाण केली. मला धोका दिला नं.. तुला उडवू का? अशा शब्दात तिला धमकी दिली.

प्रेमात आकंठ बुडालेले बरेच तरुण वेळप्रसंगी बेभान होतात. मागचा पुढचा काहीच विचार न करता, ती यांची न होता, दुस-याची झाल्याने तिचा जीव घेण्यापर्यंत अशा युवकांची मजल जाते.
अमरावती शहरातील राजापेठ ठाण्याच्या हद्दीत एका कॉलनीत सुद्धा असेच काहीसे घडले. पीडित युवतीच्या तक्रारीवरून राजापेठ पोलिसांनी सचिन लांडगे (वय 27 ), मोहीत प्रजाप्रती (वय 27) यांच्याविरुद्ध घरात घुसून विनयभंग, मारहाण व जीवे मारण्याची धमकी दिल्या प्रकरणी पोलिसानी गुन्हा दाखल केला.

पीडितेचा मोबाईल हिसकावून फोडून नुकसान केल्याप्रकरणी सुद्धा त्यांच्याविरुद्ध गुन्हा दाखल करण्यात आला. गुन्ह्यात सहकार्य केल्याप्रकरणी मोहीत यास पोलिसांनी अटक केली.
सचिन हा मागील चार ते पाच महिन्यांपासून 22 वर्षीय युवतीच्या मागे लागला होता. त्याने तिचा पाठलाग सुरू केला. तिने प्रेमाने बोलावे, सोबत राहावे अशी त्याची इच्छा होती. परंतु तिने सचिनच्या मागणीकडे दुर्लक्ष करून दुस-याच्या गळ्यात वरमाला घातली. असे पोलिस निरीक्षक किशोर सूर्यवंशी यांनी सांगितले. जिच्यावर आपण जीव ओवाळीत होतो, ती आता दुसऱ्याची झाली. हे सचिन लांडगे यास समजले. त्यामुळे तो चिडला. त्याने साथीदार मोहीतच्या मदतीने पीडित युवतीचे घर गाठले. तिचा आधी गळा आवळला. आपल्याला धोका का दिला म्हणून त्याने तिच्या डोक्‍यावर रिव्हॉल्हर धरले. चाकूही काढला. रिव्हॉल्हरने उडविण्याची धमकी देऊन जबर मारहाण करून जखमी केली. पीडितेच्या तक्रारीवरून पोलिसांनी गुन्हा दाखल केला.

सविस्तर वाचा -  विचित्र अपघात! तीन ट्रकला उडवून तो ट्रक धडकला पेट्रोल पंपावर आणि...

एकतफी प्रेमप्रकरणातून ही घटना घडल्याचे दिसून येते. सचिन पोलिसांच्या रडारवर असून, अटकेनंतर त्याचे बयाण नोंदवून पुढील कारवाई केल्या जाईल.
किशोर सूर्यवंशी, पोलिस निरीक्षक, राजापेठ ठाणे.  

संपादन - स्वाती हुद्दार