अमरावती : लॉटरी लागल्याची बतावणी करून आर्थिक लुबाडणुकीच्या घटना सतत घडत आहेत. त्याला ग्रामीण भागातील लोक बळी पडत असल्याचे दिसून येत आहे. दोन दिवसांत तिसऱ्या व्यक्तीची फसवणूक झाली. अशा घटनांमध्ये दिवसेंदिवस वाढ होत असताना नागरिकही पाहिजे त्या प्रमाणात जागरूक नसल्याचे दिसून येत आहे. 

प्रमोद रामराव खडसे (वय 47, रा. खेड, ता. मोर्शी) असे फसवणूक झालेल्या व्यक्तीचे नाव आहे. त्यांना तोतयाने 57 हजार रुपये दिलेल्या खात्यावर ऑनलाइन भरण्यास सांगून लुबाडले. ग्रामीणच्या सायबर पोलिसांनी दोन क्रमांकाच्या सिम कार्ड धारकांविरुद्ध फसवणुकीचे गुन्हे दाखल केले. श्री. खडसे यांना 29 मे रोजी एका मोबाईलवरून फोन आला. संपर्क करणाऱ्याने केबीसीकडून अडीच लाखांची लॉटरी लागल्याची बतावणी केली. त्यानंतर खडसे यांना त्यांच्या व्हॉट्‌ऍपवर एक बॅंकेचा खाते क्रमांक पाठविला. त्यावर 29 ते 31 मे या दोन दिवसांत विविध कारणे सांगून ऑनलाइन पैसे भरण्यास सांगितले. 

हेही वाचा : नवलच! माकडाचं पिलू घेत आहे 'ऑनलाइन' शिक्षण 

खडसे यांनी अनोळखी मोबाईल धारकाने सांगितल्याप्रमाणे आदेश पाळले. त्यानंतर त्या मोबाईल धारकाने मोबाईल स्विच ऑफ केला. फसवणूक झाल्याचे लक्षात आल्यानंतर खडसे यांनी पोलिसांत तक्रार केली. चोवीस तासांपूर्वी ग्रामीण भागातील एक टेलर व युवक अशा दोघांना याच पद्धतीने लुबाडले गेले होते. अनोळखी व्यक्तीसोबत ऑनलाइन आर्थिक व्यवहार करू नये, असे वारंवार आवाहन करूनसुद्धा नागरिक तोतयांच्या आमिषाला बळी पडत आहेत.