शंकरपूर (चंद्रपूर) : तीन वर्षांची चिमुकली खेळण्यात दंग होती. खेळता खेळता ती सार्वजनिक विहिरीजवळ आली. विहिरीत डोकावताच ती आत पडली. ही बाब तिच्या वडिलाच्या लक्षात आली. काळजाच्या तुकड्यासाठी त्यांनी कशाचीही पर्वा न करता विहिरीत उडी घेतली. त्यांना पोहता येत नव्हते. बापलेक दोघेही गंटागळ्या खायला लागले. त्याच वेळी गस्तीवर असलेल्या एका पोलिस शिपायाच्या कानावर ही गोष्ट आली. त्याने कसलाही विचार न करता विहिरीत उडी मारली आणि बापलेकीला सुखरूप बाहेर काढले. ही थरारक घटना शंकरपूर येथील वॉर्ड क्रमांक 5 मध्ये शुक्रवारी रात्री 8.30च्या सुमाराला घडली. परमेश्‍वर नागरगोजे असे त्या पोलिस शिपायाचे नाव. 

शंकरपूर पोलिस चौकीचे प्रभारी सहायक पोलिस निरीक्षक श्री. जांभळे आपल्या कर्मचाऱ्यांसह गस्तीवर होते. दरम्यान, त्यांना वॉर्ड क्रमांक 5 मध्ये सार्वजनिक विहिरीवर गर्दी आणि आरडाओरड होताना दिसले. त्यांनी तातडीने धाव घेतली. चौकशी केली. तेव्हा प्रभाकर बारेकर यांची तीन वर्षांची मुलगी खेळताना विहिरीत पडली. तिला वाचविण्यासाठी तिच्या वडिलांनी विहिरीत उडी घेतल्याचे सांगण्यात आले. सगळे घाबरलेले होते. 

विहिरीत बापलेक दोघेही गटांगळ्या खात होते. यावेळी पोलिसांच्या पथकात शिपाई परमेश्‍वर नागरगोजेही होते. त्यांनी क्षणाचाही विलंब केला नाही. आपला भ्रमणध्वनी आणि पैशाचे पाकीट सहकाऱ्यांजवळ दिले आणि थेट विहिरीत उडी मारली. विहीर 40 फूट खोल. त्यात 15 फुटांपर्यंत पाणी आहे. मात्र, परमेश्‍वर यांनी गावकऱ्यांच्या मदतीने दोघांनाही सुखरूप बाहेर काढले आणि सगळ्यांचा जीव भांड्यात पडला. 

हेही वाचा : माकड दोन दिवस होते विहिरीत पडून; शेतकऱ्याने घातले खाऊपिऊ... वाचा पुढे

बापलेकीला शंकरपूर येथील आरोग्य केंद्रात दाखल करण्यात आले आहे. उपचारादरम्यान दोघांच्याही प्रकृतीत सुधारणा झाली आहे. थोडाही उशीर झाला असता तर मोठी दुर्घटना घडली असती. मात्र, परमेश्‍वर यांच्या धाडसाने दोघांचा जीव वाचला. हा थरार गावकऱ्यांनी अनुभवला. सगळ्यांनी पोलिस शिपाई परमेश्‍वर नागरगोजे यांचे आभार मानले. नावच नाही, तर तुम्ही आमच्यासाठी साक्षात परमेश्‍वर आहात, अशी भावना चिमुकलीच्या वडिलाची होती.